PAOK-u i Kaçes prenoton grupet, Legia një hap larg suksesit
Sadiku zëvendësohet në të 56-tën, Grezda luan 73 minuta
Një mbrëmje jo shumë pozitive për shqiptarët ka qenë ajo e ndeshjeve të para të fazës "play off" të Europa Ligës. PAOK-u i Kaçes ka fituar 3-1, por shqiptari nuk është aktivizuar. Legia e Varshavës ka barazuar 1- 1, ndërkohë që Sadiku është zëvendësuar dhe Osijeku i Grezdës është mundur në shtëpi nga Austria e Vienës 1-2.
POLONI - Skuadra e Legias së Varshavës tentoi që të kualifikohej në fazën e grupeve në Ligën e Kampionëve, mirëpo humbja e ndeshjes së parë përballë Astanës bëri që shqiptari në këtë ekip të mos mjaftonte me golin e shënuar në disfatën 3-1. Dje, bomberi i Kombëtares shqiptare të futbollit ka qenë i pari që ka dërguar sinjale rreziku për portierin kundërshtar me një goditje jashtë zonës, por gardiani i Sherif Tiraspolit ka arritur të neutralizojë gjithçka. Pjesa e parë e ndeshjes mes polakëve dhe ekipit moldav, që eliminoi Kukësin, ka përfunduar pa gola. Në bazë të statistikave, goditjet drejt kuadratit kanë qenë të barabarta nga të dyja skuadrat. Armando Sadiku ka provuar si gjithmonë që të bëjë më të mirën e tij, por mbrojtja kundërshtare në bllok dhe topat e paktë kanë bërë që shqiptari të mos arrijë te goli. Në të 56-tën, trajneri i skuadrës kampione në fuqi të Polonisë e ka zëvendësuar Sadikun me Hamalainen.
GREQI - Mediat greke raportojnë së ndryshimi i trajnerit ka sjellë një tjetër atmosferë te PAOK-u. Kjo gjë është parë që në ndeshjen kualifikuese në fazën "Play Off" kundër Osterunds. Suedezët kanë kaluar të parët në avantazh, mirëpo skuadra e Kaçes ka barazuar në fraksionin e parë dhe në të dytin ka mbyllur takimin në rezultatin 3-1. Për fat të keq, Ergys Kaçe nuk është aktivizuar për asnjë minutë në këtë përballje. Megjithatë, gjatë ditëve të fundit, në Greqi raportohet se trajneri i ri është duke u dhënë shanse të gjithë futbollistëve për të treguar vlerat në stërvitje, mes tyre edhe mesfushorit të Kombëtares shqiptare. Ky triumf e bën thuajse të sigurt kalimin në grupe të PAOK-ut. KROACI - Ejupi i ka dhënë avantazhin momental Osijekut në sfidën kundër Austrisë së Vjenës, por Barisiç ka humbur një penallti 5 minuta më vonë për të dyfishuar. Skuadra e Grezdës ka pësuar dy gola, ndërkohë që shqiptari është zëvendësuar në minutën e 73-të.