Sfidë për Mugunën nga Zambia
Mesfushori, letër zyrtare për t'u larguar nga Gor Mahia
Afrika rezultoi tokë e bekuar për Tiranën, duke qenë se Merveil u bë një nga futbollistët më të shtrenjtë që ka shitur skuadra 24 herë kampione. Së fundmi, kërkesat e trajnerit brazilian janë përqendruar te pista afrikane, lidhur me të shkuarën e Ze Marias. Një prej të piketuarve nga bardheblutë, është mesfushori i Gor Mahias, Kenet Muguna. Këtë të fundit, drejtuesit kryeqytetas po e presin që të pajiset me dokumentacionin përkatës dhe po bëhet një punë intensive që të mund t'i vihet në dispozicion trajnerit brazilian në kryeqytet. Rivaliteti - Mirëpo, Tirana nuk duhet të mendojë vetëm për të bindur drejtuesit e Gor Mahias për lojtarin, pasi sytë duhet t'i ketë edhe nga… Zambia. Kampionia e kësaj të fundit, Zanako, është duke tentuar shërbimet e futbollistit dhe duket se po rivalizon me bardheblutë në Shqipëri.
MESFUSHORI - Gjithçka duket se është vendosur nga vetë Muguna. Raporti me ish-trajnerin e tij, Ze Marian, e ka bindur lojtarin që të lërë skuadrën aktuale. "Muguna ka bërë një letër zyrtare në klub dhe kërkon që të largohet. Mirëpo, për momentin mund të them që është lojtar nën kontratë dhe duhet të presë deri në fund të vitit", ka deklaruar Ronald Ngala për mediat afrikane.