Shënoi gol në miqësore, Çota zyrtarisht te Dinamo
Mirel Çota do të jetë sulmuesi i skuadrës së Dinamos në sezonin e ardhshëm futbollistik. Sulmuesi që është stërvitur ditët e fundit me blutë, mësohet se dje ka arritur akordin përfundimtar me drejtuesit e klubit dhe pritet të firmosë zyrtarisht kontratën që do ta mbajë sezonin e ardhshëm me kryeqytetas. Sulmuesi nga Librazhdi ka një eksperiencë të gjatë në kampionatin shqiptar, ku ka luajtur shumë skuadra si në Superiore ashtu edhe në Kategorinë e Parë dhe do të jetë një pikë e fortë në sulmin dinamovit. Cilësitë e tij, futbollisti i ka treguar në ndeshjen e fundit miqësore që është luajtur dy ditë më parë ndaj Tiranë, ku Çota arriti të shënonte edhe golin e fitores. Dinamo e sezonit të ardhshëm pritet që të përforcohet ndjeshëm edhe me elementë të tjerë, në mënyrë që të plotësohen ato vende të lëna bosh nga largimet. Gjithashtu trajneri Allmuça është duke ndjekur edhe lojtarët e rinj që ka në provë, ku do të përzgjedhë më të talentuarit, për t'i pasur nën urdhrat e tij për sezonin e ardhshëm. Skerdilaid Sulozeqi