Europiani U-16, Shqipëria ngec që në start

Ka nisur dje në Shkup të Maqedonisë kampionati europian i vajzave për U-16-ën, Divizioni B Grupi D, aktivitet ku merr pjesë edhe Shqipëria. Por që në ndeshjen hapëse, kombëtarja shqiptare, e drejtuar nga trajnerja Valbona Sako, e ka nisur në mënyrën më të keqe të mundshme. Përfaqësuesja e vogël kuqezi u mposht me rezultatin e thellë 102-41 nga Zvicra. Një ndeshje e dominuar dhe komanduar nga rivalet zvicerane. Këto të fundit krijuan shkëputjen që në pjesën e parë në shifrat 52-29, për të mos u dhënë më asnjë mundësi vajzave shqiptare për ndonjë mrekulli në debutimin europian. Të konsumuara në dy periodat e para, basketbollistet tona shfaqën shenja lodhjeje në pjesën e dytë duke mos kaluar as kuotën e 10 pikëve, respektivisht 7 në periodën e tretë dhe 5 në periodën e katërt. Kështu Shqipëria nuk arriti për asnjë moment të rivalizonte duke humbur me diferencë të plot 61 pikëve e duke bërë një paraqitje zhgënjyese. Kjo konfirmon edhe një herë tjetër problemet që ka basketbolli i moshave, kryesisht ai i vajzave në arenën ndërkombëtare. Kombëtarja ndodhet në grup së bashku me Zvicrën, Bosnjë Hercegovinën, Danimarkën, Britaninë e Madhe dhe Sllovakinë. Përballë britanikeve, Shqipëria do të luajë sot ndeshjen e dytë në orën 12:00.