Murinjo i ofron Ibrës rolin e zëvendëstrajnerit në fushë

Zlatan Ibrahimoviçit do t'i ofrohet roli i zv/trajnerit te Mançester Junajtid nga Zhoze Murinjo në përpjekje për ta bindur që të firmosë një kontratë të re, sipas "Independent". Sulmuesi suedez, i cili është duke u riaftësuar nga një dëmtim i rëndë në gju, që pësoi në ndeshjen kundër Anderlehtit në fund të sezonit, ka mbajtur raundin e parë të bisedimeve. Dhe për t'u bindur nga trajneri i Mançester Junajtid që të qëndrojë edhe një tjetër sezon në "Old Trafford", britanikja "Independent" zbulon se tekniku portugez i ka ofruar edhe një rol në stafin e tij teknik, ku ai do të kujdeset për t'i përcjellë përvojën e tij brezave të rinj. Një rol që Murinjo ia ofroi edhe Didie Drogbasë në "Stamford Bridge" gjatë eksperiencës së dytë në Londër. 35-vjeçari, do të kishte mundësi kështu që të punonte si ndihmës i Mout edhe pas varjes së këpucëve të tij në gozhdë.