Korabi në “gjumë letargjik”, por Mëziu premton ringritjen
“Të martën prezantojmë trajnerin dhe nisim punën”
Një kohë e gjatë në heshtje ka shqetësuar jo pak tifozët e Korabit për përfaqësimin e skuadrës së tyre në sezonin e ardhshëm në Kategorinë e Parë. Deri në këto momente skuadra është pa një trajner dhe pa lojtarë të konfirmuar. Megjithatë administratori i dibranëve, Fehmi Mëziu, në një prononcim për "Panorama Sport", është shprehur: "Gjatë kësaj periudhe jemi përqendruar në rregullimin e stadiumit dhe sistemimin e bazës materiale të ekipit. Gjithashtu jam në bisedime me disa prej lojtarëve dhe të hënën e të martën kam si objektiv që t'i zyrtarizojë të gjithë. Për këtë arsye, kemi qëndruar në heshtje. Në fillimjavën e ardhshme do të emërohet trajneri i ri. Kam biseduar me 2-3 që mendoj se janë në parametrat e trajnerit që ne duam për ringjitjen e skuadrës në Superiore, por nuk dua të bëj me dije emrat, pasi do t'ju informoj në momentin që do të bëhet edhe zyrtarizimi i atij që do të marrë drejtimin e skuadrës. Gjithashtu janë 7 lojtarë që do të qëndrojnë nga sezoni i kaluar dhe pjesa tjetër do të vijë nga merkato", ka thënë Mëziu. Financat - Në sezonin e kaluar, Korabi u përball me probleme financiare, por Mëziu shprehet se për sezonin e ri futbollistik kjo pjesë është siguruar. "Pa financa nuk mund të ecësh, pasi ne e provuam një gjë të tillë në sezonin e shkuar. Aktualisht kemi siguruar një fond për bazën materiale nga një dibran që është dashamirës i skuadrës së Korabit. Gjithashtu është edhe një mik i Dibrës, që do të investojë për ekipin. Kam bindjen se skuadra ditën e martë do të dalë në fushën stërvitore dhe përgatitjet do të kryhen në Tiranë, ndërsa ndeshjet në Dibër. Kemi humbur pak kohë në ndërtimin e ekipit, gjë të cilën e kanë bërë skuadrat e tjera, por ne kemi ecur në heshtje, duke qëndruar me "këmbë në tokë" dhe sistemuar të gjitha gjërat e tjera. Viti i kaluar na dha një leksion dhe mësuam shumë për futbollin shqiptar. Por, jemi në punë për të ndërtuar një skuadër të re me lojtarë cilësorë", ka përfunduar Mëziu.