Vogli shpalos objektivat: Kastrioti në Superiore

Presidenti i krutanëve premton edhe disa goditje të tjera cilësore deri në mbyllje të merkatos

Kastrioti ka nisur prej kohësh përgatitjet për sezonin e ri futbollistik dhe merkato e zhvilluar deri më tani është në funksion të një objektivi të vetëm, atë të ngjitjes në Superiore. Alban Vogli, presidenti i skuadrës së Kastriotit, në një intervistë për "Panorama Sport", ka shpalosur projektin e tij për krutanët, duke theksuar kthimin e ekipit në elitë. Cili është objektivi i Kastri- otit në këtë sezon? Objektivi për këtë sezon është rikthimi i skuadrës në Superiore dhe deri më tani i kemi të gjitha shanset për t'ia dalë. Jo se kundërshtarët nuk i kanë, por besoj se deri më tani kemi ndërtuar një skuadër konkurruese dhe të denjë për ta arritur këtë objektiv, lojtarët që ne kemi afruar në skuadër dinë të luajnë futboll dhe të respektojnë fanellën.

Keni pasur preferencat tuaja në përzgjedhjet e lojtarëve apo ia keni lënë gjithçka në dorë trajnerit?

Unë asnjëherë nuk jam përzier në punët e trajnerit, as në sezonet e shkuara dhe as në këtë sezon, trajneri ka pasur dorë të lirë për të zgjedhur.

Prisni përforcime të tjera nga merkato, apo mund ta konsideroni të mbyllur?

Do të kryejmë edhe dy afrime të rëndësishme dhe aktualisht jemi në bisedime me disa lojtarë të njohur të futbollit vendas. Presim të mbyllim akordin dhe shumë shpejt dhe ata do të bëhen pjesë e skuadrës.

FSHF ka futur stadiumin "Kastrioti" në listën e impianteve që nuk plotëson kriteret. Çfarë detyrash ka lënë komisioni i licencimit?

Në fakt, ne kemi një projekt për stadiumin ku në bashkëpunim me Bashkinë e Krujës do të bëjmë një rikonstruksion të plotë të të gjithë stadiumit, ambienteve të brendshme dhe pjesën e medias. Në projekt është edhe fusha e stërvitjes që do t'i shërbejë ekipit të parë të stërvitet, por njëkohësisht edhe grupmoshave të Kastriotit. Liridon Pasha