Murinjo frenon: Nuk jemi kampionë dhe as ekip ëndrrash
"Klubi premtoi, por s'erdhi askush, nuk pres surpriza"
Pas "pokerit" ndaj Uest Hemit, java e dytë do ta vendosë Mançester Junajtidin kundër Suonsit. Në lidhje me sfidën e programuar për sot, në ora 13:30 në "Liberty Stadium", trajneri Zhoze Murinjo në konferencë për shtyp u përpoq të mbante në nivele të larta përqendrimin e skuadrës së tij. Portugezi nuk hezitoi të komentonte edhe merkaton nga e cila, pavarësisht premtimeve, nuk pret më asnjë surprizë.
PA EUFORI - Në deklaratën e tij, ai theksoi se: "Kam aq përvojë dhe ekuilibër sa të kuptoj se një ndeshje e fituar 4-0 nuk të shpall kampion Anglie, apo të transformon automatikisht në një skuadër ëndrrash. Mund të pranoj që jemi favoritë, por aspak një ekip ëndrrash, thjesht kemi më shumë besim se sezonin e kaluar dhe kemi më tepër kohë që punojmë së bashku. Tani duhet durim dhe këmbë në tokë, pasi edhe sezonin e kaluar pas tri javësh kishim nëntë pikë, por kampionatin e mbyllëm në vendin e gjashtë".
MERKATO - Në lidhje me merkaton dhe veçanërisht transferimin e munguar të Ivan Perisiç, Murinjo u përgjigj pa shumë optimizëm: "Nuk jemi në merkato dhe nuk do të kthehemi në rast se një ngjarje e pazakontë s'na detyron të ndërhyjmë. Me drejtorin Uduard kam folur dhe i kam siguruar që nuk do të ketë asnjë presion nga ana ime, pavarësisht se kërkova katër blerje. Ai e di çfarë është më e mira për klubin dhe unë jam gati të punoj, edhe pse blerja e katërt ndoshta nuk do të vijë. Ka lojtarë që ndeshjen e parë e luajnë me një skuadër, ndërsa të dytën me një ekip tjetër. Personalisht jam shumë i qetë, pasi e njoh cilësinë e organikës që kam në dispozicion dhe nuk ka problem nëse nuk vjen askush tjetër".
KUNDËRSHTARI - Suonsi vjen pas një barazimi pa gola ndaj Sauthemptonit në javën e parë dhe në fushën e tyre do të kërkojnë jo vetëm golin, por dhe trepikëshin e parë në kampionat. Murinjo i di mirë kurthet e Premier Ligës, ndaj e këshillon skuadrën: "Xhordan Aju nuk është i vetmi element nga i cili duhet të kemi kujdes. Suonsi është një skuadër agresive në shtëpi dhe ne nuk duhet të bëjmë gabimin që t'i nënvlerësojmë. Kam ende disa dyshime mbi formacionin, por në fushë do të zbresin një pjesë e mirë e atyre që siguruan suksesin në premierën në kampionat".