Shkëlqen Milani, të rinjtë bëjnë ligjin
Fitore dhe lojë, “ eroplani” shkërmoq Krotonen e jetit
Fillim më të mirë nuk mund të kishte. Pa varësisht disa ndryshimeve në formacion, Milani shënon një tjetër fitore, e katërta radhazi për sezonin kuqezi që ka nisur prej një muaji për shkak të eliminatoreve në Ligën e Europës ndaj Kraiovës. Rodrigez në mbrojtje, Lokateli në mesfushë dhe Kutrone në majën e sulmit janë ndër risitë e pakta që propozon "Djalli". Ndeshja nuk ka shumë histori dhe vendoset që në minutat e para, kur Çekerini del me karton të kuq pas një ndërhyrje, ndaj Kutrones në zonë, që i shpëtoi arbitrit, por jo teknologjisë. Penalltia e akorduar shndërrohet në gol nga Frenk Kesi, i cili debuton me gol në kampionat me fanellën e re. Krotone pa Ajetin shpresonte në një nisje ashtu siç e kishin mbyllur kampionatin e kaluar, por kuqezinjtë rezultuan një kafshatë shumë e madhe për kalabrezët. Kuqezinjtë në avantazh numerik dhe shifrash vazhdojnë të prodhojnë lojë dhe në minutën e 18-të gjejnë edhe golin e dytë të ndeshjes. 19-vjeçari Kutrone, pasi debutimit me gol në "San Siro" në Ligën e Europës, gjen edhe golin e parë në Serinë A. Krosim në zonë nga i papërmbajtshmi Suso dhe sulmuesi i ri gjen golin me kokë nga brenda zonës. Festa e djaloshit përfundon në krahët e Montelës, trajneri që po i beson kaq shumë, pavarësisht moshës së re të futbollistit. As pesë minuta nuk kalojnë dhe Kutrone i kthen nderin Susos, duke i shërbyer për golin e tretë të Milanit që fut fitoren në kasafortë. Budimir përpiqet të shënojë të paktën golin e nderit për Krotonen, por në ndeshjen e djeshme kishte vend edhe për lavdi nga ana e Donarumës, i cili tregon vlerat e tij edhe pse nuk ngacmohet thuajse aspak nga kundërshtarët. Kur duhen edhe 4 minu-
ta nga përfundimi i pjesës së parë, skuadrat bëjnë një pushim të detyruar për shkak të një problemi me ndriçimin. Kujtojmë se, për shkak të disa ndryshimeve në stadiumin "Enco Shida", Krotone mori lejen për të zhvilluar ndeshjen në impiantin e saj vetëm pasditen
e së shtunës. Shtesa e akorduar nga arbitri Mariani nuk sjell asnjë ndryshim me skuadrat që u drejtohen dhomave të zhveshjes me rezultatin e vulosur. Pjesa e dytë është administrim forcash dhe energjish për skuadrën e Montelës, e cila luan e pashqetësuar.
Në kërkim të lavdisë dhe golit të parë, edhe Andre Silva zë vendin e Kutrones. Portugezin dhe goditjes së tij me kokë i mohon festën Kordaz, por ritmi është i ulët dhe kuqezinjtë nuk përfitojnë. Edhe Çahlanoglu mundohet të gjejë golin personal,
por goditja e tij nuk bën dëme të mëtejshme. Krotone përgjigjet duke u hedhur në sulm, pavarësisht mundësive të pakta për rezultat, por Muzakio dhe Bonuçi administrojnë çdo shqetësim në zonë pa shumë vështirësi. Hoze Mauri merr vendin e Lokatelit
që tregoi personalitet në kabinën e regjisë. Pikërisht argjentinasi tenton portën pas pak minutash, por sërish Kordaz mohon golin e "pokerit" kuqezi. Me Donarumën, që grushton një tentativë të Barberis, mbyllet sfida me tre gola dhe tri pikë për Montelën dhe të tijtë.