Daja: Një ndeshje për... rekord
“Premion do ta ndaj me Osmanin. Të tregohemi pragmatistë, s'jemi përgatitur për penalltitë”
Ilir Daja kërkon rekor din me Skënderbeun. Nëse korçarët i kanë provuar grupet, ai do që të mbahet mend si trajneri që kaloi 4 ture radhazi në Ligën e Europës. Në konferencën e dhënë për mediat, tekniku evidentoi se ekipi i tij ka potencialin për të kaluar Dinamon e Zagrebit. Përtej seriozitetit dhe analizës së hollësishme që i bën ekipit dhe kundërshtarit, nuk mund të shmangte as batutat, ndërsa thotë që premion e tij do ta ndajë me Tefik Osmanin.
Daja, a është gati Skënderbeu për 90 minutat që e ndajnë me historinë?
Kemi një 90-minutësh, akoma më të vështirë se ai në Zagreb në fakt. Presioni është në të dyja anët. Dinamo e ndien për vetë eksperiencën dhe traditën që ka në Ligën e Europës, sidomos në dekadën e fundit. Por, edhe ne nuk mbetemi pas, pasi pritshmëritë janë rritur ndjeshëm karshi Skënderbeut, për vetë lojërat e mira që kemi zhvilluar.
Pritshmëritë e shtuara, a e motivojnë më shumë ekipin?
Këtë nuk duhet ta bëjmë ne, pritshmëritë duhet t'i kanalizojmë në detyrat e ndeshjes. Duhet të jemi më të përqendruar dhe të luajmë të gjithë bashkë, si grup. Kur kundërshtari të ketë iniciativën, pres që edhe tifozët të jenë bashkë me ne. Suporti duhet i fuqishëm, pasi vetëm kështu mund të bëjmë realitet ëndrrën për të shkruar në grupe. Sigurisht që është shumë e vështirë, pasi kemi një rival shumë të fortë. Ata meritojnë respekt, por vlerat tona ne kurrsesi nuk mund t'i harrojmë. Nëse nuk beson apo respekton vetveten, s'arrin as qëllimet.
Çfarë Skënderbeu do të shohim nesër (sot)?
Një Skënderbe ndryshe jo vetëm në fushë, por edhe në tribuna. Në dijeninë time, biletat thuajse janë shitur të gjitha. Megjithatë, interesi i jashtëzakonshëm nuk duhet që të na ngarkojë emocionalisht. Prezencën e tyre e marrim si "bonus".
Në çfarë gjendjeje janë Gavazaj dhe Jashanica, pasi mediat kanë raportuar se kanë problem. Do të jenë të gatshëm për Dinamon?
I vetmi që ka probleme është Jashanica. Edhe sot (dje) bëri një kontroll të imtësishëm shëndetësor. Pas rezonancës magnetike, na është dhënë shpresë që ai do të jetë në fushë,
me përqindjen më të madhe. Gjithsesi, të presim deri nesër (sot) paradite. Nëse ai reagon mirë pas terapive që është duke bërë, atëherë do të jetë në fushë.
Nëse Jashanica luan nga minuta e parë, a do të shohim të njëjtin formacion si në Zagreb?
Besoj se do të jetë i njëjti. Në fund të fundit, formacioni që bën mirë, është i duhuri. Por me këtë 11-she duhet të përsërisim pjesën e parë në Zagreb, por për të gjithë lojën. Vetëm kështu do të jemi në rrugë të mbarë.
A është kjo ndeshja më e rëndësishme e karrierës së
Ilir Dajës dhe, nëse po, s'i do ta fitoni?
Mendoj se është një ndeshje shumë e rëndësishme, jo vetëm për mua personalisht, por edhe ekipin. Edhe pse Skënderbeu e ka një pjesëmarrje në grupet e Ligës së Europës, kur historia përsëritet, vështirësia normalisht është më e madhe. Por, këtë herë e veçanta lidhet me rekordin që do të vendosnim në futbollin shqiptar me pjesëmarrjet në grupe. Asnjë ekip nuk ka arritur që të kalojë 4 ture për të shkuar në këtë fazë.
Ekipi ka luajtur 7 ndeshje deri më tani në Europë, ka
humbur vetëm një ndaj Mladës, sa po ndihet lodhja?
Lodhja është prezente. Mirëpo, kur luftohet për një ndeshje, si ajo me Dinamon, të gjithë jemi të përgatitur për të dhënë "rezervat" e pashfrytëzuara deri më tani. Duhet të japim maksimumin, por të qëndrojmë me këmbë në tokë dhe duke e analizuar drejt, rivali është realisht i fortë. Edhe pse bëmë një gjysmëhapi si në rezultat, ashtu dhe performancë.
A ka potencialin e nevojshëm Skënderbeu për të kaluar Dinamon?
Janë të gjithë komponentët
bashkë, që e çojnë një ekip përpara. Ana psikologjike, tekniko-taktike dhe fizike. Të përballosh në mënyrë të barabarta e të kalosh ekipe si Kairati, Malda apo të bësh një pjesë shumë të mirë në Zagreb, do të thotë që potenciali ekziston. Individët e kanë eksperiencën, por natyrshëm që ndeshja s'i ngjan ndeshjes. Nëse do të jemi në kohezion dhe të ekuilibruar faktikisht, do të kemi më shumë forca edhe në planin fizik për të gjithë 90 minutat.
Osmani do ta ndajë premion me tifozët nëse kualifikoheni, po ju me kë do ta ndani?
Meqenëse më pyetët me humor, kështu po ju përgjigjem. Nëse Osmani e ndan me tifozët, unë do ta ndaj me Osmanin. A do mjaftoheni me një barazim? Rëndësi ka vetëm kualifikimi. Ne duhet të jemi pragmatistë. Kundërshtarin e kemi analizuar, por të njëjtën gjë mendoj se kanë bërë edhe ata. Në këto
ndeshje me sistem eliminimi, ndeshja e bukur mbahet mend vetëm një javë, ndërsa kalimi në grupe të fut në histori. Ndaj më intereson kualifikimi dhe jo loja. Por, kur flasim për 90 minuta, nuk mund të rrish vetëm në planin e sakrificës, por të kontrollosh edhe elementët që të bën që të shpresosh që të shkosh përpara.
Në ndeshjen me Maldën ia dolët me penallti, edhe pse nuk ishit përgatitur për to, a jeni gati për 11- metërshat nesër (sot)...?
Është e njëjta situatë. Nuk jemi përgatitur fare. Kemi lojtarët që kanë qetësi psikologjike për të përballuar situata të tillë, por mendoj se përgatitje të tilla në stërvitje, është krejt ndryshe nga ajo që përjetohet në fushë. Nëse do vijë radha për 11-metërshat, atëherë do veprojmë si ndaj Mladës, do t'u besojmë atyre lojtarëve që kanë më shumë besim.