350 punonjës policie, ja masat dhe akset që do bllokohen
Policia e Elbasanit ka ndërmarrë një sërë masash në prag të ndeshjes Skënderbeu-Dinamo Zagrebi që do të zhvillohet sot, në orën 20:00, në stadiumin "Elbasan Arena". Për mbarëvajtjen e ndeshjes, do të angazhohen 350 punonjës policie, ndërsa nuk do lejohet qarkullimi në disa akse rrugore. Gjithashtu policia kërkon nga sportdashësit të jenë të pajisur me biletë dhe me kartë identiteti. Për sa u përket lokaleve që ndodhen përreth stadiumit, ato do të qëndrojnë të mbyllura deri në përfundim të ndeshjes. Njoftimi i policisë:
"Drejtoria Vendore e Policisë Elbasan ka marrë një sërë masash organizative në drejtim të sigurimit të rendit dhe qetësisë, për zhvillimin sa më normal para, gjatë dhe deri në përfundim të ndeshjes ndërkombëtare të futbollit ndërmjet ekipeve përfaqësuese të Shqipërisë dhe të Kroacisë, e cila do të zhvillohet më datë 24.08.2017 në orën 20:00, në Stadiumin 'Elbasan Arena'. Sa më sipër, në orën 16:00, të datës 24.08.2017, ju bëjmë me dije se:
-Nuk do të lejohet parkimi i mjeteve në rrugën '11 Nëntori' nga 'Kryqëzimi i Romëve' deri në dalje në unazë.
-Nga rruga 'Kozma Naska' deri tek ish-konservimi nuk do të lejohet parkimi i mjeteve pasi do të përdoret për raste emergjente. -Nuk do të lejohet parkimi i automjeteve përreth dhe përballë stadiumit.
-Nuk do të lejohet qarkullimi i mjeteve nga 'Kryqëzimi i Romëve' deri te rruga 'Kozma Naska'.
-Nuk do të lejohet qarkullimi i mjeteve nga rruga 'Kamber Sejdini', 'Kryqëzimi i Romëve' deri te kryqëzimi me rrugën 'Kozma Naska'. Lidhur me ndeshjen, do të angazhohen 350 punonjës policie nga Drejtoria Vendore e Policisë Elbasan, Komisariatet vartëse të saj dhe nga FNSH-ja e Tiranës.
Të gjithë sportdashësit që do të marrin pjesë në këtë aktivitet, të jenë të pajisur me biletë dhe me kartë identiteti dhe të mos kenë me vete: a) sende të forta, b) shishe (të çfarëdolloj) c) fishekzjarrë d) monedha apo metale (të çfarëdolloj) e) çelësa të ndryshëm
Në të kundërt, NUK do të lejohen të futen në stadium. Në hyrje të stadiumit, do të kontrollohen të gjithë sportdashësit. Të gjitha lokalet që ndodhen përreth stadiumit, nga ora 17:00 dhe deri në përfundim të ndeshjes do të jenë të mbyllura. Drejtoria Vendore e Policisë Elbasan u kërkon qytetarëve që të minimizojnë më datë 24 dusht 2017, duke filluar nga ora 16:00 lëvizjen e tyre me automjet brenda qytetit të Elbasanit, çka do të sillte një ndihmesë të madhe në zhvillimin sa më normal të këtij aktiviteti. Duke falënderuar qytetarët për mirëkuptimin dhe mediat për bashkëpunimin!", shkruhej në komunikatën e policisë.