Lushnja superiore, por Albpetroli e sfidon për 45 minuta
Patosarakët rezistojnë një pjesë pa pësuar gol
Pavarësisht se është pjesë e Kategorisë së Dytë, Albpetroli ka arritur t'i bëjë ballë më së miri për 45 minuta skuadrës së Lushnjës, e cila do të luajë në Superiore, duke mbajtur të paprekur portën e tij. Megjithatë skuadra patosarake është dorëzuar pa kushte në fraksionin e dytë, duke pësuar jo pak, por plot pesë gola nga ekipi që drejtohej nga Bano.
PJESA E PARË - Me statusin e ekipit që do të luajë në elitë sezonin e ri futbollistik, Lushnja do të jetë e para që do të kërkojë golin me anë të Pepës që minutën e gjashtë të takimit, por portieri Baba tregohet i vëmendshëm dhe arrin të presë gjuajtjet e sulmuesit mik. Loja zhvendoset në mesfushë dhe me kalimin e minutave myzeqarët e kanë të vështirë që të depërtojnë në zonën kundërshtare, çka i detyron që të provojnë goditjet nga distanca, të cilat nuk janë të sakta. Ndërkohë që në minutën e 25-të, Hatia futet bukur në zonën e Lushnjës dhe rrëzohet. Patosarakët pretendojnë për 11-metërsh, por nuk është i këtij mendimi kryesori Ferrataj. Pjesa e parë e takimit do të mbyllet pa gola, pavarësisht këmbënguljes së Lushnjës.
PJESA E DYTË - Me fillimin e fraksionit të dytë të takimit, Romario Prifti do të ketë një rast të artë për të shënuar për Albpetrolin, por gjuajtja e tij përballë portieri mik gjen shtyllën pingule. Kaq është dashur që myzeqarët të "zgjohen" dhe ta kthejnë ndeshjen në festi-
val golash. Ndërkohë që dy trajnerët kanë aktivizuar edhe lojtarët e stolit. Branica hap serinë e golave për ekipin e tij në minutën e 55-të dhe, më pas, është Prençi që dyfishon. Albpetroli e ka të vështirë të reagojë, ndërsa në minutën e 75të është edhe Pepa, i cili arrin
të gjejë rrugën e rrjetës. Ka ende minuta dhe rrjedhimisht gola. Canka e Voda do të mbyllin takimin me golat e tyre, ndërsa patosarakët janë të dorëzuar dhe pa mundur që të shënojnë të paktën një gol në portën kundërshtare. Amarildo Gropa