E zbulojnë hakerat: Di Maria është një lojtar i Barcelonës
Profili zyrtar e fshin, por argjentinasi është pranë
Është ora 3:07 e mëngjesit dhe në profilin e katalanasve shkruhet: "Mirë se vjen Angel Di Maria". E firmosur nga vetë klubi i Barcelonës. Cicërima në "Twitter" është e vërtetë dhe llogaria është e verifikuar. Por a do të jetë argjentinasi zëvendësuesi i Nejmarit në "Camp Nou"? Ndoshta, por për momentin asgjë nuk është bërë zyrtare. E ka konfirmuar klubi katalanas, të cilit i është hakeruar profili në "Twitter" gjatë mbrëmjes mes së martës dhe së mërkurës përpara se të rimerrej sërish në kontroll dhe ata kanë kërkuar ndjesë për postimin.
ARRIHET AKORDI? - Por lajmi që të gjithë tifozët katalanas ka bërë të lumtur nuk do të thotë se është i pavërtetë, të paktën edhe disa ditë. "Sport" raporton se argjentinasi do të transferohet në "Camp Nou" dhe për t'u zyrtarizuar marrëveshja kanë mbetur vetëm detajet e fundit për t'u sqaruar. "Mes Barcelonës dhe PSG-së është gjetur akordi për shifrën e rreth 50 milionë eurove, Postimi i hakeruar i Barcelonës në profilin zyrtar në 'Twitter' madje është arritur edhe marrëveshja personale me futbollistin", shkruan e përditshmja katalanase. Përgënjeshtron "As" - Por mediat e Madridit nuk mendojnë se bisedimet e transferimit të ish-lojtarit të Realit te rivalët e tyre janë kaq të avancuara. Përkundrazi, ato shkruajnë se presidenti Al-Khelaifi u ka bërë me dije drejtuesve blaugrana se nuk kanë asnjë shans që të firmosin me yllin e tij. Gjithnjë sipas "As", presidenti i PSG-së është i acaruar nga paditja e fundit që Barça i ka bërë Nejmarit dhe PSG-së për prishjen e njëanshme të kontratës dhe duke i kërkuar që t'i rikthejë bonusin e përfituar për firmën e rinovimit. Vështirësitë që Barcelona po has për të gjetur pasardhësin e "O Ney"-t me dy objektivat e saj kryesorë (Kutinjo dhe Dembele), kanë bërë që Bartomeu të kërkojë për alternativa të tjera. Dhe ndërsa edhe Seri është një pistë që është zbehur, sot të gjitha gjasat të çojnë te Di Maria si pasardhësi i Nejmarit në "Camp Nou".