Konte drejt shkarkimit, Çelsi kërkon ta zëvendësojë me Tuhelin
"Bild" zbulon vendimin drastik të bosit Roman Abramoviç
Dashuria mes Kontes dhe Çelsit ka përfunduar? Lajmi i konfirmimit të tij në stolin e skuadrës me një rritje të konsiderueshme të rrogës 18 korrikun e shkuar, duket sikur ka ndodhur një jetë më parë. Sot Antonio Konte rrezikon seriozisht stolin e Çelsit. Pronari i kampionëve të Anglisë, Roman Abramoviç, në vend që të pranojë kërkesat e teknikut italian për përforcime në merkato, po mendon ta shkarkojë atë. Dhe, sipas asaj që shkruan "Bild", blutë e Londrës e kanë gjetur edhe pasardhësin e Kontes, ai është ish-trajneri i Dortmundit, Tomas Tuhel. "Humbja në shtëpi ndaj Bërnlejt në javën e parë të kampionatit dhe fitorja me shumë fat dhe vuajtje në derbin me Totenhemin në javën e dytë",
shkruan e përditshmja gjermane, e kanë bindur bosin rus për të marrë vendimin drastik. Gjithnjë sipas "Bild"-it, manjati rus i ka dhënë dritën jeshile drejtoreshës së klubit, Marina Granovskaia (e cila ka pasur gjithnjë një marrëdhënie me uljengritje me Konten) që të nisë kontaktet me trajnerin gjerman, i cili, gjatë sezonit të fundit në stolin e
Dortmundit, fitoi Kupën e Gjermanisë, përpara se t'i jepte lamtumirën klubit. Një rokadë në këto momente në stolin e Çelsit mund të ndryshonte 180 gradë edhe situatën e Diego Kostës, të cilin italiani e largoi me një mesazh në telefon: Konte mund të jetë duke paguar edhe çmimin e krisjes me një prej sulmuesve më të mirë të historisë së
Çelsit këto vitet e fundit. Me sa duket, Granovskaia nuk e ka kapërdirë aspak menaxhimin jashtë çdo etike të rastit "Kosta", i shkarkuar nga trajneri vetëm me një "sms" gjatë verës. Për më tepër, orientimi i klubit londinez është ai i investimit tek të rinjtë, të cilin Tuhel dhe ish-trajneri i Barcelonës, Luis Enrike, dinë ta bëjnë shumë mirë, por ky i fundit penalizohet për shkak të njohurive të cunguara të gjuhës angleze. Por Konte kërkon blerje të tjera që të jenë gati për të luftuar menjëherë në Premier Ligë dhe Champions. Menaxheri i bluve, pasi ka transferuar në "Stamford Bridge" Moratën, Rydigerin dhe Bakajokon, kërkon edhe internistin Antonio Kandreva, torinezin Andrea Beloti dhe dy nga yjet e Leiçesterit kampion të Ranierit, Xhemi Vardinë dhe Deni Drinkuotërin.
RAVANELI - "Jam i surprizuar. Lamtumira është e ngjashme me atë nga Juventusi. Është një harakiri e Çelsit. Tani unë e shoh te Barcelona", tha ish- shoku i skuadrës së Kontes te Juventusi, Fabricio Ravaneli.