Tomori drejt Sarandës, Isufi kërkon largimin
Tomori do të niset gjatë mesditës së sotme drejt Sarandës për të zhvilluar fazën përgatitore. Të besuarit e trajnerit Santiliano Dule do të akomodohen në një prej hoteleve të qytetit, ku do të qëndrojnë për gati 12-të ditë. Burime të sigurta për "Panorama Sport", bëjnë me dije se klubi beratas ka arritur një akord me drejtuesit e Butrintit që të kryejnë në stadiumin e tyre seancat stërvitore. Fusha e stadiumit të Sarandës është me tapet artificial, njësoj si ai që pritet të shtrohet gjatë këtyre ditëve në stadiumin e Tomorit. "Kemi bërë çdo gjë gati për sa i përket akomodimit të lojtarëve dhe fushave sportive ku do të kryejmë fazën përgatitore. Kushtet janë tepër të përshtatshme për lojtarët tanë, të cilët do të ndihen komod. Arsyeja pse kemi zgjedhur Sarandën është për faktin sepse në qytetin e Pogradecit ndodhen shumë ekipe dhe është tepër e vështirë për të gjetur terrene sportive të lira. Gjithsesi, arsyeja që na e ka përforcuar akoma edhe më shumë këtë ide ka qenë pikërisht stadiumi i Butrintit, i cili është me tapet artificial, njësoj si ai që pritet të shtrohet brenda këtyre ditëve në stadiumin tonë. Kemi kohën e duhur për t'u ambientuar me fushën dhe të tregojmë superioritetin ndaj kundërshtarëve. Duhet të falënderojmë, në radhë të parë, drejtuesit e skuadrës së Butrintit për zemërgjerësinë, të cilët na kanë vënë në dispozicion stadiumin e tyre për të zhvilluar këtë fazë përgatitore. Tomori i këtij edicioni nuk do të jetë aspak i lehtë për t'u kaluar. Gjithsecili duhet që t'i bëjë mirë llogaritë, pas ne jemi më se të bindur që do të synojmë ngjitjen në kategorinë elitare", thuhet në një deklaratë të klubit beratas. LARGIMI - Tomorit pritet që t'i largohet një lojtar shumë i rëndësishëm nga formacioni bazë, teksa një gjë e tillë nuk është pritur aspak mirë nga tifozëria vendase. Bëhet fjalë për mesfushorin beratas Enea Isufi, i cili mësohet t'i ketë kërkuar "divorcin" drejtuesve të klubit dhe pse kontrata e tij u firmos nga vetë 25-vjeçari pak ditë më parë. Gjithçka mësohet të ketë ardhur për shkak të angazhimeve që pritet të ketë Isufi, duke vazhduar shkollën e lartë, që ndoshta do ta shkëpuste atë përgjithmonë nga futbolli i luajtur. Ndërkohë, nuk përjashtohet mundësia që pozicionin e Isufit ta marrë mesfushori tjetër Berion Myzyri. Ndërkohë me skuadrën në fazën përgatitore, pritet të bashkohet edhe portieri 26-vjeçar, Eni Haxhi, i cili ka luajtur më parë me Egnatian. Eris Sylyku