Duro, “gjyq” Danilo Alveshit para ekipit: Ndrysho urgjentisht!
Flamurtari/ Trajneri analizon humbjen në miqësore
Shpëtim Duro kritikon përpara ekipit Danilo Alveshin. Gjatë një analize të kryer për fazën përgatitore, por edhe pas ndeshjes me Apollon Pontou, trajneri nuk ka kursyer kritikat ndaj ekipit dhe në veçanti ndaj sulmuesit brazilian. Burime brenda analizës të zhvilluar në Veria të Greqisë, thanë për "Panorama Sport" se tekniku ka shfaqur pakënaqësi karshi sulmuesit kryesor, madje ka shkuar deri aty sa i ka folur para ekipit, duke i kërkuar që të reflektojë. Trajneri i ka kujtuar sulmuesit Alvesh se po bën të njëjtat gabime që ka bërë edhe sezonin e kaluar në finalizimin e rasteve. "Kam pakënaqësi, në veçanti ndaj sulmuesit Danilo Alvesh. Danilo, je një lojtar dhe ne presim shumë prej teje, por ti vazhdon me mënyrën e rasteve të humbura, ashtu si në kampionatin e kaluar. Del përpara portës, por nuk shënon. Çfarë ke? Çfarë të mundon? Nëse ke ndonjë gjë, na e thuaj. Je lojtari më i vlerësuar te Flamurtari, por nuk po e justifikon. Dua të kthesh urgjentisht. Unë nga ty dhe Bushiç pres më shumë. Ju duhet të jeni shtylla e ekipit. Kampionatin nuk duhet ta nisni kështu. Kërkoj ndryshim të menjëhershëm nga ana juaj. Alvesh dhe Bushiç, ju mund të bënit më shumë në këto miqësore që kemi luajtur, në veçanti, pakënaqësi kam ndaj Alveshit. Duhet të ndryshosh urgjentisht, pasi nëse përsërit gabimet e një viti më parë, atëherë nuk kemi gjë në vijë", mësohet se është shprehur Duro. ANALIZA - Shpëtim Duro ka zhvilluar me ekipin edhe analizën pas ndeshjes miqësore me Apollon Pontou. Trajneri pati kritika për mbrojtjen dhe finalizimin. "Në ndeshjen e fundit me Apollon Pontou, patëm disa raste të humbura. Nuk është vetëm loja, për të cilën unë jam i kënaqur, por duhet të shënojmë përpara porte. Po ashtu, në ndeshjen e fundit u vunë re edhe gabime të bëra nga mbrojtja. Ishin gabime, të cilat mund që të shmangeshin, kështu që duhet të jeni sa më të kujdesshëm. Po ashtu u duk qartë që disa lojtarë,
te të cilët unë kam besim, nuk ishin në freskinë e duhur fizike. Jam i kënaqur nga lojtarët që u aktivizuan në pjesën e dytë. Ata i dhanë një frymë tjetër skuadrës. Tregohuni të kujdesshëm. Duhet ta dini që formacionin do ta arrijnë vetëm ata që e meritojnë. Ka konkurrencë në ekip dhe duhet që secili nga ju të punojë
sa më fort për të arritur maksimumin për vete dhe skuadrën", ka thënë Duro.
MERKATO - Flamurtari nuk do të ketë më afrime të reja. Merkato tashmë është mbyllur. Një fakt të tillë e konfirmoi edhe për "Panorama Sport", trajneri. "Është shumë e vështirë të kërkoj përforcime në këto momente. Të gjithë lojtarët janë me kontrata. Kemi dy sulmuesit kryesor Alvesh dhe Bushiç, që kanë qenë nga sezoni i kaluar dhe ata duhet të mbajnë mbi supe të gjithë përgjegjësinë në skuadër. Merkato është e mbyllur tashmë dhe unë jam i gatshëm të filloj kampionatin", deklaroi Duro. Ermal Sika