214 lëvizje në merkato, ja si janë “shpërbërë” skuadrat
Skënderbeu është më i ekuilibruar, Partizani ndryshon stil
Nëse në janar për shumicën e skuadrave merkatoja konsiderohet më tepër si plotësuese, duke qenë se është mesi i sezonit, e kundërta ndodh gjatë verës. Ndryshimet e mëdha kanë prekur thuajse 80% të klubeve të Kategorisë Superiore, teksa kur është mbyllur zyrtarisht merkato e verës, janë kryer në total 214 lëvizje zyrtare. Një shifër relativisht e lartë, që tregon edhe një herë tjetër për revolucionet e shpeshta në ekipet tona, ku natyrisht kjo vjen edhe si pasojë e mungesës së strategjive. Në hyrje janë bërë 104 transferime, ndërsa sa u përket largimeve, shifra është e madhe, plot 110 lojtarë të skarcuar në 10 skuadrat e Superiores. Shumica e tyre janë lënë të lirë nga klubet, por ka edhe një pjesë që edhe pse kanë qenë nën kontratë, e kanë prishur këtë të fundit me marrëveshje. Klubi më i stabilizuar duket Skënderbeu, që ka afruar 10 lojtarë dhe ka larguar 8. Nëse te korçarët, në masën 80% është ruajtur grupi i sezonit të kaluar, e kundërta ndodh tek ekipet e tjera, përfshi edhe ato që kanë pretenduar titullin. Ndryshime të mëdha, duke filluar nga Kukësi, ku janë larguar 13 lojtarë, mes tyre edhe titullarë të padiskutueshëm. E njëjta gjë edhe me Partizanin, nga i cili janë larguar 10 lojtarë të sezonit të fundit, në një kohë që janë afruar 13 futbollistë. Largimit të sulmuesit më të mirë të sezonit të kaluar, Kaleb Ekuban, të kuqtë i janë përgjigjur me një goditje të bujshme, pikërisht Edgar Çanin. REKORDMENËT DHE "TË VARFRIT" Flamurtari dhe Teuta janë për rekord në këtë merkato, qoftë sa u përket afrimeve, po ashtu edhe largimeve. Nëse në Vlorë kjo nuk përbën më çudi, pasi klubi ndryshon përbërjen në një përqindje të madhe në çdo sesion transferimesh, habia vjen nga Durrësi. Klubi i Teutës largoi 14 lojtarë pas përfundimit të sezonit, duke bërë ndryshime radikale. Nga ana tjetër, vlonjatët kanë skarcuar
16 futbollistë. Edhe Kamza e sapongjitur në Kategorinë Superiore është prekur nga "sëmundja" e mosbesimit te grupi që e riktheu në elitën e futbollit shqiptar. Plot 17 largime dhe 13 afrime, teksa bëhet fjalë
për emra të njohur të kampionatit. Në miniaturë duket si Korabi i fillimit të kampionatit të vjetshëm, ku askush nuk e mendonte të rënë me atë përbërje që kishte. E, megjithatë, gjithçka mbetet për t'u parë, në një
kohë që shembull i kundërt vjen nga skuadra tjetër që fitoi të drejtën e ngjitjes në Superiore. Lushnja ka ruajtur grupin e sezonit të kaluar, duke larguar vetëm tre lojtarë, ndërsa ka afruar tetë. Luftëtari i ka nisur mes problemesh
përgatitjet, më vonë se kushdo skuadër, në një kohë që i bëri lëvizjet vetëm në ditët e fundit të merkatos së verës. Surprizës së sezonit 2016-2017, përveç trajnerit, i janë larguar 6 lojtarë, mes tyre emra të rëndësishëm. Gjithsesi, 70% e grupit është ende aty, madje edhe Dejvi Bregu e Kristal Abazaj. Trajneri i ri është një uruguaian, i cili ka afruar disa lojtarë amerikanojugorë që mbetet të shihen në sezonin e ri. Ndërkohë, lëvizje të mëdha në dalje ka pasur te
Vllaznia dhe Laçi. Por, shkodranët kanë rikthyer Edon Hasanin, Gilman Likën dhe Erjon Vucajn, tre goditje shumë të rëndësishme, që kanë kompensuar të gjitha firot. Ndërsa goditja e kurbinasve mund të quhet Arturo Rexhinaldo. Sulmuesi nga Mozambiku, pas një sezoni fantastik me Luftëtarin, ku dhe u afirmua në futbollin shqiptar, është bindur nga oferta e presidentit Pashk Laska dhe shihet si zëvendësuesi i denjë i ganezit të larguar, Mensah.