Kamza bën "bingo", pas Kuqit merr edhe Stevan Raçiç
Drejtuesit e Kamzës e kanë me seriozitetin më të lartë rikthimin në Kategorinë Superiore, pasi gjatë merkatos së verës kanë afruar shumë emra cilësorë. Kamzalinjtë kanë bërë "bingo" edhe në limitet e këtij procesi, ku pas mbrojtësit vlonjat, Taulant Kuqi, kanë arritur të finalizojnë edhe një nga preferencat e tyre, pikërisht, ishsulmuesin e Partizanit, Stevan Raçiç. Prej kohës qe përfolur për një akord mes Kamzës dhe sulmuesit serb, i cili pas martesës sikur u distancua dhe mendoi që këtë sezon të ishte pjesë e skuadrës së vendlindjes së tij. Por kamzalinjtë kanë insistuar deri në fund, pasi e kanë bindur Raçiç që të kthehet në Superiore. Në pamundësi për të qenë prezent, mësohet se sulmuesi e ka firmosur në mënyrë elektronike marrëveshjen me Kamzën, kontratë të cilën klubi do ta depozitojë në FSHF. Risia në përgatitjet e djeshme të Kamzës ka qenë prezenca e qendërmbrojtësit Taulant Kuqi, i cili në fillim të javës pati akord me Bylisn, por më pas devijoi për t'u vënë nën urdhrat e trajnerit Ramadan Ndreu. Aktualisht te Kamza janë edhe dy qendërmbrojtës të huaj, Leonardo Da Silva Lelis dhe Ivan Fushtar, kështu që me ardhjen e vlonjatit ky repart është më i plotë. Taulant Kuqi tani është pjesë e Kamzës, pasi ai ka firmosur edhe kontratën njëvjeçare me drejtuesit e klubit. Përpos këtyre dy goditjeve të fundit, merkatoja e Kamzës mbetet e hapur deri në limitet e lejuara dhe shënjestra mbetet afrimi i sulmuesit Sebino Plaku, i cili ende mbetet pjesë e Skënderbeut, por që nuk shikohet si pjesë e korçarëve. Abdulla Dushku