De Biazi “bekon” Panuçin: Fiton 3-0
"Pezullimi? Cikalleshi është një djalë i jashtëzakonshëm, por Kristiani nuk është budalla!"
Lojtarët e Kombëtares shqiptare janë për ballur dje me një surprizë të këndshme para fillimit të stërvitjes. Në fushën e stadiumit "Elbasan Arena" ka zbritur Xhani De Biazi, i cili është takuar me të gjithë lojtarët, duke qëndruar për pak minuta me ta dhe stafin e ri teknik. Batuta, shumë përqafime dhe duartrokitje kanë shoqëruar këtë takim të veçantë të ish-teknikut, i cili nuk ka kursyer as ngacmimet me pasardhësin e tij, Kristian Panuçi. Pas vizitës në stërvitje, më pas De Biazi ka folur për "Supersport", duke ka treguar edhe ndjesinë e këtij takimi surprizë. Pas largimit nga stoli kuqezi, ish-trajneri tregoi se çfarë pret tani nga Kombëtarja nën drejtimin e Panuçit.
Cila ishte ndjesia e takimit me lojtarët që keni stërvitur për 6 vite?
Pak e çuditshme, një ndjesi pak e veçantë. Më pëlqeu të vija këtu t'u uroja fat, t'u thosha që jeta vazhdon, që është mundësia të përmirësohet më tej atë që është bërë deri këtu. Uroj që me Kristian Panuçin të paraqiten mirë, se janë në rrugën e duhur. Është një skuadër, e cila po rinohet me afrimet e fundit, pastaj mund të kompletohet se janë shumë lojtarë që mund të rikuperohen.
Çfarë duhet të bëjë kjo skuadër më shumë nën drejtimin e Panuçit?
E rëndësishme është që të qëndrojnë të përqendruar, me kokën në fushë, që të mos çojnë këmbët nga toka. Të mundohemi të çuditim, duke dhënë 100% në fushë.
Çfarë këshillash i keni dhënë trajnerit të ri?
Kristianit nuk i dhashë shumë këshilla, është një person me shumë eksperiencë, ka qenë edhe me Kapelon. Mendoj se ka nevojë të jetë i qetë, të bashkëpunojë me të gjithë. Uroj të shkojë sa më larg. E rëndësishme është të shohë këto 4 ndeshje për "Euro 2020".
E keni vendosur të ardhmen?
Nuk e di. Presim, tani nuk kam ngut, nuk dua të zgjedh gjënë e parë që del në rrugë. Të shohim nëse fati mund të më rezervojë një mundësi të mirë dhe të bëj më të mirën e mundshme. Kam pasur mbledhje me drejtuesit për një Kombëtare, të shohim çfarë do bëhet. Edhe nëse vjen klub është mirë gjithashtu, mjafton serioziteti dhe të jem në qendër të projektit.
Një parashikim për ndeshjen ndaj Lihtenshtejnin?
Mendoj se fitojmë 3- 0, shpresoj kështu.
Po ndaj Maqedonisë çfarë prisni?
Në Maqedoni është më e vështirë, por mendoj se pse është më e vështirë, do të shkojmë me vendosmërinë e duhur dhe përqendrimin e duhur.
Panuçi ka pezulluar Cikalleshin, do ta bënit të njëjtën zgjedhje?
Unë e di që Sokoli është djalë i jashtëzakonshëm. Sipas meje, Kristian ka marrë një vendim se duhet të kuptohet që Kombëtarja është e jashtëzakonshme, se është moment i veçantë për lojtarët. Di edhe situatën e lojtarëve, si Sokoli që gjeti kontratë të mirë për jetën e tij, duhen kuptuar të dyja palët. Mendoj se shpejt do të flasin, Sokoli është djalë ari dhe Kristian nuk është budalla.