Ulje e frikshme në Rinas, Pauriç beson te mrekullia
Trajneri: Shqipëria, një miks mes Spanjës e Italisë
Një moment paniku te Kombëtarja e Lihtenshtejnit gjatë mbërritjes në Shqipëri. Avioni i skuadrës që do të ndeshet nesër me Shqipërinë në "Elbasan Arena" është ulur me vështirësi në pistën e aeroportit "Nënë Tereza" duke shqetësuar lojtarët dhe stafin. Një moment që ka ngjallur frikë dhe janë dashur disa minuta që futbollistët dhe pjesëtarët e skuadrës të qetësoheshin. Ka qenë mesfushori Sandro Vieser, ai që ka bërë publik lajmin gjatë daljes në konferencë për shtyp ditën e djeshme. "U frikësuam nga ajo ulje e fortë e avionit. Megjithatë, gjithçka kaloi dhe tani jemi më mirë. Ishin momente të vështira, por e rëndësishme është se u mbyll gjithçka aty", ishin fjalët e Vieser.
TRAJNERI
Rene Pauriç ishte i qetë në konferencën e djeshme për shtyp. "Vijmë nga një mot i freskët, ndërkohë që këtu është shumë nxehtë. Megjithatë, shpresojmë që të mos na krijojë probleme dhe të bëjmë një ndeshje të mirë. E dimë që Shqipëria është një skuadër shumë e fortë dhe ka lojtarë cilësorë. Por, ne do të bëjmë
gjithçka për të marrë rezultat pozitiv. Do të jetë e vështirë, por gjithçka mund të ndodhë. Shqipëria mendoj se ka një mënyrë loje ku alternohen disa veçori të Spanjës dhe Italisë. Për sa i përket sulmuesit që na mungon, kemi futbollistë të tjerë ofensivë dhe do të
tentojmë për gjithçka", deklaroi fillimisht tekniku i Lihtenshtejnit. Armando Sadiku ka qenë pjesë e Vaduzit, skuadër e Lihtenshtejnit, një vit më parë. Por, sot mund të mungojë për shkak se është i sëmurë me grip. "Nëse nuk do të jetë në fushë, do të ishte një
mungesë shumë e rëndësishme për Shqipërinë. Është një futbollist shumë i mirë, me cilësi që e njohin të gjithë. Gjithsesi, ne do të bëjmë lojën tonë me synimin për të marrë rezultat pozitiv", deklaroi ndër të tjera Pauriç në konferencën e djeshme për shtyp.