Argjentina, huq me Ikardin
Mesi&CO, një pikë e hidhur ndaj Uruguait, por ende në lojë falë harakirit të Vidalit
Në orët e para të ditës së djeshme, Uruguai dhe Argjentina frenuan njëratjetrën në një barazim pa gola, në një sfidë ku rastet ishin aq të pakta, në raport me sulmet e të dyja skuadrave. Kavani dhe Suarez prisnin në shtëpinë e tyre Mesin, Dibalën dhe Ikardin që rikthehej të luante me kombëtaren pas 4 vjetësh. Për kapitenin e Interit një penallti e mohuar nuk mjafton për të justifikuar thirrjen, pasi prej tij pritej më shumë duke parë se për t'i bërë vend në tredhëmbësh Sampaoli kishte lënë në shtëpi një profesionist goli si Gonzalo Higuain. Në kampin uruguaian, Luis Suarez u sforcua të mos mungonte në supersfidën e vlefshme për javën e 15-të të eliminatoreve për "Rusi 2018", por iu desh të ndalej për shkak dëmtimi duke futur rishtazi në ankth Barcelonën. Në radhët e Argjentinës debutim edhe për trajnerin Horge Sampaoli, i cili nëse marrim për bazë rezultatin e ndeshjes nuk mund të thuhet se kishte bërë ndryshime të mëdha në nivel loje. Ylli absolut Lionel Mesi, i cili ishte nismëtari i rreziqeve të pakta nga të tijtë. Argjentina bëri pak për të siguruar tri pikët që do t'i jepnin pozita më komode në renditje, teksa rrezikoi shumë në minutën e 32të kur një goditje e Suarez nga 30 metra rrezikoi portën e Romeros. Tjetër kombinim RodrigezKavani pesë minuta më pas vuri në provë ish-gardianin e Sampdorias. Rreziqet e vetme argjentinase erdhën nga një goditje nga larg e Biljas dhe nga një kombinim Dibale-Mesi me këtë të fundit që u ndal nga Muslera. Një goditje dënimi e "Pleshtit" dhe një tentativë e Ikardit (një penallti e mohuar gjithashtu) ishin rastet e vetme në një pjesë të dytë të vakët në aksione dhe volum loje nga dy ekipet, të cilat ndanë nga një pikë që nuk ndihmon renditjen e asnjërës, sidomos atë të Argjentinës, e cila nëse nuk ndryshon ritëm në ndeshjes e radhës, rrezikon kualifikimin direkt në Botërorin rus.