Dokumenti i FIFA-s, leje e përkohshme dhe dyshime për veprimet e Kukësit
Zbardhet vendimi që organizata ndërkombëtare u ka nisur dy federatave
Çështja gjyqësore mes Kukësit dhe Izair Eminit nuk është mbyllur me vendimin e dalë nga zyrat e FIFA-s. "Panorama Sport" ka siguruar një kopje të dokumentit të organizatës që drejton futbollin në botë, sipas të cilit Izair Emini lejohet t'i bashkohet klubit të Shkëndijës së Tetovës, me anë të një regjistrimi të përkohshëm. Në dokumentin në fjalë, përshkruhet kërkesa që Federata Maqedonase ka bërë në emër të Shkëndijës së Tetovës për të regjistruar futbollistin dhe si FSHF ka refuzuar të kalojë kartonin e transferimit në sistemin TMS me pretendimin se ai ka një kontratë të vlefshme me Kukësin. Shkëndija e Tetovës kishte treguar për FIFA-n situatën e krijuar dhe pretendimin e Eminit se nuk kishte asnjë lloj njohurie për kontratën që Kukësi kishte depozituar në FSHF dhe që e lidhte atë me këtë klub edhe për një vit tjetër. FIFA i kishte kërkuar FSHF-së që të jepte prova për ekzistencën e kësaj kontrate me Kukësin dhe institucioni që drejton futbollin në vendin tonë i kishte dërguar një kopje të kontratës në gjuhën shqipe më datë 29 gusht. Në këto rrethana, FIFA kishte vendosur që çështja të gjykohej provizorisht nga një gjyqtar i vetëm (procedurë e përshpejtuar), para se të shkonte para komisioneve të saj, në mënyrë që të mos pengohej regjistrimi i lojtarit. Dokumenti i FIFA-s shpjegon gjithashtu se si gjyqtari kishte vendosur që të lejonte regjistrimin e Eminit te Shkëndija e Tetovës, duke u bazuar në dy pika të qarta. E para ishte ajo se kontrata e dërguar nga FSHF në FIFA ishte vetëm në gjuhën shqipe, ndaj hidhej dyshim për vërtetësinë e saj. E dyta ishte se, pavarësisht çështjes që kishte një muaj që trajtohej, klubi shqiptar nuk kishte kërkuar asnjëherë në mënyrë direkte kthimin e futbollistit në radhët e tij. "Këto rrethana e dërguan gjyqtarin drejt konkluzionit se klubi nuk duket që është realisht i interesuar për të pasur shërbimet e këtij futbollisti", shkruhet në vendimin që lejon regjistrimin e Eminit në radhët e tetovarëve. FIFA sqaron gjithashtu se kjo nuk pengon vijimin e procedurave ligjore mes dy skuadrave, nëse Kukësi do të vazhdonte të ndiqte çështjen në rrugë ligjore në Komisionet përkatëse të FIFA- s duke ankimuar prishjen e njëanshme të marrëveshjes nga lojtari. Procedura thjesht i jepte mundësinë Eminit që të regjistrohej me klubin e Shkëndijës brenda afateve të merkatos së futbollistëve në pritje të një ankimimi të mundshëm të Kukësit.