Lushnja krenohet me katër miqësoret e fundit
Lushnjarët e kanë mbyllur muajin gusht me katër fitore, në pesë miqësore të luajtura për këtë muaj. Të gjitha takimet testuese janë zhvilluar jashtë shtëpisë, për shkak të rikonstruksionit të stadiumit "Roza Haxhiu". Pas miqësores me Leçen, në fillim të gushtit, të cilën lushnjarët e humbën me rezultatin 0-4, verdhejeshilët kanë zhvilluar katër takime testuese në 10 ditë, duke i fituar të gjitha përballjet. 2-0, ndaj Shkumbinit dhe Apolonisë, që militojnë në Kategorinë e Parë. Dy goleada ndaj Albpetrolit (5-0) dhe Luzit(4-0), që janë në Kategorinë e Dytë. Skuadra e teknikut Artan Bano ka qenë një makineri golash duke shënuar 13 gola dhe mos pësuar asnjë gol në sfidat e luajtura në Shqipëri. Portierët Bejte dhe Spaho, që janë aktivizuar në katër miqësoret e fundit, e kanë ruajtur rrjetën të paprekur. Për sa u përket golave të shënuar te Lushnja e kanë dërguar topin në rrjetë të gjithë, nga mbrojtja në sulm. Canka, Pepa dhe Branica kanë shënuar nga dy gola. Mesfushorët Vodo e Shkullaku nga një gol. Tre gola për repartin mbrojtës me firmat e Byzhytit, Prençit dhe Bufasit. Ndërkohë, lushnjarët kanë mbyllur praktikisht merkaton, por Ervis Kaja, edhe pse ka arritur marrëveshje në parim dhe po stërvitet me ekipin, nuk ka firmosur ende. Përpos ndonjë afrimi të mundshëm në minutën e fundit, skuadra verdhejeshile duket gati për të përgatitur premierën me Vllazninë. Sezonin e kaluar lushnjarët e nisën me këmbën e mbarë duke mundur 1-0, në shtëpi, Tomorin me golin e Endri Maganit. Edhe këtë sezon Lushnja e nis si "shtëpiake" dhe përballë verdhëjeshilëve është Vllaznia. "Ekipi është përgatitur mirë dhe kemi qenë të impenjuar në punën tonë. Kemi një javë të rëndësishme për të përgatitur ndeshja dhe Lushnja synon të bëjë më të mirën në Kategorinë Superiore", u shpreh mbrojtësi Endri Magani. Alban Alushi