Kashami i bindur: Apolonia synon Superioren

"Skuadra do vlerësojë edhe Kupën e Shqipërisë"

Skuadra fierake, nën drejtimin e trajnerit Ndriçim Kashami, po punon me intensitet dhe ngarkesa të larta. Në një prononcim për "Panorama Sport", trajneri u shpreh: "Nga skuadra janë larguar disa futbollistë që mbyllën sezonin e kaluar, por ndërkohë po afrohen dhe do të afrohen të tjerë në moshë të re, por cilësorë, që i janë nënshtruar provës prej më shumë se një jave. Në përgjithësi jam i kënaqur nga impenjimi dhe niveli që kanë treguar lojtarët gjatë stërvitjes, por dhe në ndeshjet miqësore të zhvilluara". Për sa i përket merkatos, trajneri kavajas i Apolonisë thotë: "Merkato e skuadrës sonë vazhdon pak e ngadaltë, por e mirëmenduar për të mos afruar lojtarë për emër, por të rinj në moshë, sipas strategjisë që po ndjek dhe klubi, cilësorë e me të ardhme. Besoj se shumë shpejt do t'i zëvendësojmë të gjithë vendet vakant të mbetura nga të larguarit". Më tej, tekniku Kashami ka folur për vazhdimin e stërvitjes dhe axhendën e skuadrës së tij për periudhën deri në startin e kampionatit të ri. "Skuadra do të vazhdojë rregullisht stërvitjen sipas programit dhe periudha dyjavore deri në startin e kampionatit të ri do të na shërbejë për t'u përforcuar akoma më shumë në të gjitha aspektet. Gjatë kësaj jave do të luajmë një tjetër ndeshje miqësore me Flamurtarin dhe, pas ndeshjes me Lushnjën për Kupë, pritet të zhvillojmë të shtunën e ardhshme dhe një ndeshje tjetër me Albpetrolin. Deri tani, skuadra është stërvitur me 2 seanca stërvitore në ditë dhe me ngarkesa të larta, në mënyrë që lojtarët të marrin gjithçka të nevojshme për sezonin e ri futbollistik. Apolonia për sezonin e ri do të ketë si objektiv kryesor pozicionimin mes 2-3 ekipeve më të mira të grupit, duke synuar ngjitjen në Superiore". Gjithashtu, Kashami ka folur dhe për kompeticionin e Kupës së Shqipërisë që fillon më 6 shtator. Për teknikun, skuadra do t'i vlerësojë drejt edhe ndeshjet e këtij kompeticioni të rëndësishëm dhe do të synojë të shkojë sa më lart të jetë e mundur.