FIFA “çliron” Eminin, Gjici: Do ta apelojmë
"Triumfoi e vërteta, nuk gënjej kurrë, por as nuk gënjehem"
Kukësi vazhdonte të ishte në pritje të Izair Eminit, me bindjen se sulmuesi do të kthehej në skuadër, edhe pse kishte çuar "divorcin" e tij me verilindorët në FIFA. Por duket se kjo e fundit i ka idetë e qarta dhe sheh rregulloret paksa më ndryshe nga verilindorët. "Panorama Sport" siguroi dje vendimin që ndërmori FIFA rreth çështjes së futbollistit duke i dhënë të drejtë Eminit të largohet nga Kukësi dhe të federohet me Shkëndijën e Tetovës. Lojtari stërvitet prej disa javësh me tetovarët dhe ishte vetëm në pritje të vendimit të FIFA-s për t'iu bashkuar zyrtarisht atyre, pasi ka një akord për sezonin e ri. IZAIR EMINI
Sulmuesi e ka konfirmuar për "Panorama Sport" lajmin dhe sqaron se si do të veprojë në të ardhmen. Emini pohon se nuk do të kërkojë dëmshpërblim nga Kukësi, në shenjë respekti të marrëdhënieve që ka pasur më parë me verilindorët. "Jam shumë i lumtur që e drejta shkoi në vendin e vet, pasi unë isha shumë i bindur se nuk kisha më marrëdhënie kontraktuale me Kukësin, pasi kontrata më kishte mbaruar me përfundimin e Kupave të Europës. Kisha bërë të gjitha kërkesat e nevojshme, edhe pse zyrtarë të klubit pretendonin të kundërtën dhe për këtë kanë gënjyer. Respektoj shumë presidentin Safet Gjici dhe gjithë klubin e Kukësit, pa harruar tifozërinë, që më ka mbështetur pamasë. Tani çdo gjë është zyrtare dhe unë jam lojtar i lirë, kështu që kam firmosur për ekipin tim të zemrës, Shkëndijën e Tetovës. Pas këtij vendimi të dhënë nga FIFA, më takon mua dhe përfaqësuesit tim ligjor nëse do të kërkojmë dëmshpërblim nga klubi i Kukësit. Por në respekt të punës që kam bërë dhe eksperiencës së përjetuar në atë klub, nuk do të ndërmarr një veprim të tillë. Emini nuk gënjen ndonjëherë dhe nuk mund të gënjehet. Emini është profesionist dhe bën vetëm detyrat e tij në fushën e lojës, por kjo nuk do të thotë që të drejtat e mija të shkelen apo të nëpërkëmbem. Tani çdo gjë është pastër dhe nën dritën e diellit. E falënderoj klubin e Shkëndijës që më ka mbështetur për të drejtën time. Jam krenar që jam pjesë e Shkëndijës dhe do bëj çdo gjë që të ndihmoj ekipin tim", u shpreh Izair Emini për "Panorama Sport".