“Blindohet” Kombëtarja, Shaqiri: Nuk përsëritet Serbia
Rrëfim ekskluziv i ish-kapitenit të Maqedonisë: Shqipëria favorite, ndeshja luhet në Strumicë për të pasur pak tifozë kuqezi
Frika nga incidentet e natyrës nacionaliste gjatë udhëtimit në Maqedoni me autobus, ka detyruar FSHF-në të marrë masa të paprecedenta për kuqezinjtë. Kombëtarja është nisur dje në drekë me autobus drejt Shkupit, për të mbërritur në kryeqytetin maqedonas. E shoqëruar nga një autokolonë makinash të policisë maqedonase, menjëherë skuadra është akomoduar në "Park Hotel" në orën 18:20. Si asnjëherë më parë, bashkë me ekipin kanë udhëtuar drejt Maqedonisë edhe forca të një kompanie sigurie private të kontraktuar nga FSHF. Rojet e sigurisë do të shoqërojnë kudo lojtarët në shtetin fqinj. "Është një autokolonë me forca policie që na shoqëron, por edhe një furgon me siguri private, që do të jenë me skuadrën, si në rezidencën në Shkup, ashtu edhe në Strumicë", sqaroi dje shefi i Sektorit të Marrëdhënieve me Publikun në FSHF, Gerti Çarçani. Axhenda e kuqezinjve ishte me kalimin e natës në Shkup, për të vijuar sot me një tjetër udhëtim me autobus në Strumicë. Prej rrugës disa orëshe, trajneri Kristian Panuçi vendosi që Kombëtarja të qëndrojë pushim gjatë pasdites së djeshme (seanca u krye në Elbasan), në mënyrë që ekipi të rikuperohet në Shkup. Mëngjesin e sotëm, kuqezinjtë do të transferohen në qytetin e Strumicës, aty ku në stadiumin "Mlladost" do të luhet nesër Maqedoni- Shqipëri.
AKOMODIMI - FSHF evitoi një avion çarter Tiranë-Shkup dhe zgjodhi që Kombëtarja të udhëtonte afro 4 orë me autobus nga Elbasani drejt kryeqytetit maqedonas, duke përshkruar 250 kilometra. Shqipëria zbarkoi në Shkup "e blinduar". Sipas informacioneve të "Panorama Sport", dje ishte e pamundur që të afroheshe
në hotelin e kuqezinjve. Një kordon me policë qëndron i vendosur pak metra para hotelit, ndërsa sapo i afrohesh rezidencës kuqezi, të shfaqen rojet e sigurisë private. Rrugëtimi i gjatë me autobus ka kaluar pa probleme për kuqezinjtë, por edhe pa u ndalur, edhe pse
kanë prekur të gjitha trevat shqiptare. Në ditën e parë gjithçka ka shkuar mirë për kuqezinjtë në qytetin e Shkupit.
DE BIAZI - Ishte ish-trajneri i Kombëtares shqiptare, Xhani De Biazi, ai që përcolli kuqezinjtë nga hoteli ku qenë akomoduar në Elbasan drejt Shkupit.
Në ditën e ndeshjes ndaj Lihtenshtejnit, italiani u akomodua në të njëjtin hotel me kuqezinjtë. Pak minuta përpara se autobusi të nisej, De Biazi u përqafua me të gjithë lojtarët. Në fund, një takim i përzemërt me Kristian Panuçin, por edhe shtrëngim duarsh me Dukën.