Partizani, Edgar Çani alarmon sërish
Mjeku Dhimosten Gjini largon panikun: Lojtari është top
Edgar Çani tremb sërish te Partizani, ndonëse u mendua se sulmuesi e ka kaluar shqetësimin në gju që pësoi në seancat e para stërvitore në Kashia të Italisë. Në pamje të parë, kjo gjë u la të kuptohet edhe në pjesën e parë të seancës stërvitore të pasdites së djeshme, ku lojtari u përgatit normalisht...
Edgar Çani tremb sërish te Partizani, ndonëse u mendua se sulmuesi e ka kaluar shqetësimin në gju që pësoi në seancat e para stërvitore në Kashia të Italisë. Në pamje të parë, kjo gjë u la të kuptohet edhe në pjesën e parë të seancës stërvitore të pasdites së djeshme, ku lojtari u përgatit normalisht me grupin. 28-vjeçari për rreth 90 minuta u përgatit pa probleme, duke kryer ushtrimet e karakterit fizik dhe vrapimet së bashku me ekipin. Më pas, ai kreu me sukses edhe disa ushtrime që kishin të bënin me qarkullimin dhe pasimin e topit në fushë. Në kohën që skuadra iu nënshtrua një minindeshjeje kontrolli brenda grupit, Çani u la jashtë nga stafi teknik. Fillimisht, lojtari iu nënshtrua disa ushtrimeve aerobike, duke bërë muskuj barku. Më pas, stafi mjekësor i vendosi akull në gjurin e djathtë. Gjatë kohës që lojtarët po kryenin ndeshjen e kontrollit, Çani, me gjurin e fashuar dhe me akull, largohet para kohe nga terreni stërvitor duke shkuar në dhomat e zhveshjes. Ky fakt tregon se problemi i Edgar Çanit në gju nuk ka kaluar plotësisht. Gjithsesi, duhet pranuar se sulmuesi e përballoi me sukses pjesën më madhe të stërvitjes, por mbetet për të parë nëse ai do të jetë gati për ndeshjen e 9 shtatorit me Laçin.
SQARIMI I MJEKUTLargimi para kohe i Çanit nga stërvitja e djeshme u konsiderua si një sirenë alarmi, por stafi mjekësor ka mendim ndryshe. Sipas mjekut të Partizanit, lojtari është në rregull. Largimi para kohe ishte një vendim i stafit për ta ruajtur sulmuesin pas 90 minutave stërvitje, në mënyrë që të mos e mundonte më shumë gjurin. I pyetur për largimin nga fusha të sulmuesit me gjurin e fashuar dhe me akull, mjeku i Partizanit, Dhimosten Gjini, u shpreh shkurtimisht: "Lojtari është top, nuk ka asgjë për t'u shqetësuar". Dy ditë nga përfundimi i fazës përgatitore në Itali, në një prononcim për faqen e klubit, sulmuesi sqaroi problemin që po kalon në gju, duke mos e bërë dramatike situatën.
"Gjendja ime fizike ka ardhur si rezultat vetëm i mbingarkesave në stërvitje. Aktualisht, po ndjek një program me intensitet të lartë trajtimi në kujdesin e stafit mjekësor e shoqëruar me një përgatitje atletike të diferencuar nga grupi", u shpreh Çani më 29 gusht.