Holanda ringrihet në shtëpi, tri pikë edhe Portugalia
Porto kallinjtë i falen dopietës së Proper dhe golit të të përhershmit Arjen Roben
Humbja e të enjtes së kaluar në Francë me rezultatin 4-0 është një njollë që vështirë se mund të largohet, pasi kjo disfatë ishte një "grusht" që mund t'i lërë portokallinjtë jashtë Botërorit 2018, edhe pa shpresën për të tentuar pjesëmarrjen, qoftë edhe nga "playoff"-et. Pa dyshim që diçka e tillë do të ishte shumë e rëndë për këtë përfaqësuese, e cila mungoi gjithashtu në Europianin 2016, në Francë. Gjithsesi, e vetmja gjë që i ka mbetur skuadrës së Dik Advokat për të bërë deri në fund është të tentojnë gjithçka, të fitojnë edhe dy sfidat e mbetura, pas suksesit të djeshëm, ndaj Bullgarisë. "Tulipanët" dje kanë bërë detyrën në shtëpi përballë një rivali jo të lehtë, të cilëve u kanë marrë vendin e tretë në renditje, pasi triumfuan 3-1. Të zotët e shtëpisë arritën që të zhbllokonin sfidën me një aksion fantastik, të cilin Proper e finalizoi me devijimin në rrjetë. Dhe Bullgaria nuk dukej në një ditë të mirë dhe nuk diti të reagonte, aq sa në mesin e pjesës së dytë, në të 67- ën, Arjen Roben, me një aksion të ngjashëm me golin e parë, dyfishon. Holanda mendon se ndeshja ka përfunduar, por dy minuta më vonë Kostadinov ngushton diferencën. Gjithsesi, dhjetë minuta nga fundi, është sërish Proper që vendos qetësinë në fushë, por këtë herë realizon me kokë dhe kaq mund të mjaftojë për tri pikët. Tri pikë
në kasafortë, por nga ana tjetër, Suedia e vendit të dytë nuk u bën asnjë dhuratë portokallinjve. Edhe pse në transfertë ndaj Bjellorusisë, nordikët nuk e vënë në diskutim suksesin, pasi blindojnë fitoren që në fraksionin e parë të lojës, duke shënuar tri herë me protagonistë
Forsberg, Niman dhe Berg. Në pjesën e dytë, një penallti e mbrojtësit Grankvist, në të 84-ën vulos shifrat finale në 4-0. Kaq i mjafton Suedisë që të ruajë vendin e dytë me 16 pikë dhe pret duelin direkt me Holandën, në ndeshjen e fundit të grupit, më 10 dhjetor.