Elmaz humbet sfidën me Shqipërinë, Angelovski: Më e vështirë se Izraeli
Edhe kapiteni Goran Pandev ka shqetësime, por do të jetë në fushë
Maqedonia e ka hedhur pas krahëve triumfin në transfertën me Izraelin dhe tani është duke menduar për ndeshjen me Shqipërinë. Kjo konsiderohet si një finale për të dyja skuadrat. Trajneri Angelovski ka vlerësuar kuqezinjtë maksimalisht dhe ka thënë se kjo ndeshje është më e vështirë sesa transferta me Izraelin. Në fakt, numri një i Maqedonisë nuk do të ketë të gatshëm për këtë sfidë një nga lojtarët më të mirë. Maqedonia do të ketë në ndeshjen ndaj Shqipërisë në Strumicë një mungesë shumë të rëndësishme, atë të mesfushorit Elif Elmas. Futbollisti në fjalë është vetëm 17 vjeç, por cilësohet nga të gjithë si talenti i radhës i kësaj përfaqësueseje, e cila herë pas here ka nxjerrë emra të mëdhenj për futbollin ndërkombëtar. Mesfushori debutoi në ndeshjen me Spanjën duke dhënë sinjale mjaft të mira dhe ndaj Izraelit, trajneri Angelovski nuk kishte dyshime që ta hidhte në fushë në pjesën e dytë, duke besuar te talenti i tij. Elmas ia shpërbleu duke dhënë asistin për golin e Pandev, me një pasim milimetrik për sulmuesin që shënoi golin e fitores. Por, gjatë kësaj ndeshjeje, ashtu si ndaj Spanjës, ai u ndëshkua me karton të verdhë e si rrjedhojë do të jetë spektator për ndeshjen ndaj kuqezinjve në Strumicë. Elmas ka luajtur në dy vitet e fundit me Rabotniçkin
në kampionatin maqedonas të futbollit ku u ra në sy skautëve të Fenerbahçes, të cilët siguruan transferimin e tij në ditët e fundit të merkatos së verës. Edhe kapiteni Goran Pandev ka shfaqur shqetësime, por me shumë mundësi ai do të shtrëngojë dhëmbët dhe do të jetë në fushë. ANGELOVSKI- Trajneri i Maqedonisë, Angelovski, tha
se ndeshja me Shqipërinë është shumë e vështirë dhe më delikate se ajo me Izraelin. "Jam shumë i kënaqur me fitoren e arritur, por tani duhet të mendojmë për të ardhmen. Kemi dy ditë për t'u përgatitur me Shqipërinë dhe e dimë që është ndeshje shumë e vështirë sesa ajo në Haifa. Ne duhet të përgatitemi për këtë sfidë", tha Angelovski.