Bunjaki paralajmëron dorëheqjen
Trajneri i Kosovës, Albert Bunjaki, u shpreh i kënaqur nga loja që skuadra e tij zhvilloi ndaj Kroacisë, pavarësisht humbjes 1-0. Në një prononcim për mikrofonin e "Supersport" pas ndeshjes, tekniku deklaroi se skuadra është duke u rritur nga ndeshja në ndeshje dhe ia vuri fajin kohës së shkurtër që ekipi ka në dispozicion për t'u stërvitur së bashku. Bunjaki gjithashtu tregoi se i premtoi kolegut kroat Çaçiç se Kosova do të japë maksimumin edhe në sfidat ndaj Ukrainës dhe Islandës. Ndërsa në daljen e tij në konferencën pas ndeshjes, tekniku lajmëroi largimin nga Kosova. "Rruga ime me Kosovën ka filluar në vitin 2002. Plani im ka qenë që t'i jap kësaj përfaqësueseje më të mirën. Po më dhemb zemra që nuk po e arrijmë fitoren e parë. Kosova ka për të qenë gjithmonë prioritet i jetës sime. Albert Bunjaki do të tërhiqet shumë shpejt, por fillimisht dua t'i dhuroj Kosovës fitoren e parë".
BUNJAKI
Ndërsa, për "Supersport", tekniku i Kosovës tha: "E kemi diskutuar, nuk kemi pasur shumë mundësi të punojmë për t'u përmirësuar në mbrojtje për shkak të kohës. Nga shtatori i vitit të kaluar janë zhvilluar gjithsej 19 stërvitje. Mendoj që në përgjithësi nuk jemi keq, pasi kemi pësuar 2 gola nga goditjet standarde dhe kemi shënuar një. Duhet të jemi më të përqendruar. Me afrimin e lojtarëve të rinj, skuadra ka ndryshuar. Pësimi i golit nga goditjet standarde është një problem që e diskutojmë gjithmonë edhe me lojtarët, por të jem i sinqertë kemi pak kohë në dispozicion për t'u stërvitur. Kosova ka ngritje, këtë e tha edhe kolegu i Kroacisë, Çaçiç. I premtova atij që do japim maksimumin edhe ndaj Ukrainës dhe Islandës. Ndeshjen tjetër e kemi mbas 48 orëve dhe me të vërtetë është një kohë jashtëzakonisht e shkurtër", tha Bunjaki.