Tomori shlyen 250 milionë lekë borxhe
"Nuk kemi më borxhe, tani do të ringremë skuadrën"
Tomori pastrohet nga borxhet. Gazeta "Panorama Sport" zbulon ekskluzivisht se klubi ka arritur që të shlyejë të gjitha borxhet e akumuluara ndër vite, duke hequr në këtë mënyrë një "barrë" të madhe që mbartte prej vitit 2010. Mësohet se beratasit kanë pasur disa detyrime të prapambetura ndaj institucioneve shtetërore apo bizneseve private, të cilat kapnin shifrën e më shumë se 250 milionë lekëve të vjetër. Këto detyrime kanë qenë të shpërndara në disa subjekte të ndryshme. Klubi i detyrohej OSHEE-së gati 118 milionë lekë të vjetër dhe UKBK (Ujësjellës Kanalizime Berat) rreth 15 milionë e 450 mijë lekë. Gjithashtu, drejtuesit aktualë kanë shlyer edhe borxhet e prapambetura të tatimeve, të cilat shkonin në 120 milionë lekë. Në listë ka edhe biznese private apo emra të përveçëm, një pjesë e të cilave nuk i janë shlyer ende detyrimet për shkak të mungesës së dokumentacionit në dosje. Megjithatë, ata do të rishikojnë përsëri këto dosje në mënyrë që të shlyejnë të gjitha detyrimet. Mësohet se deri në këto momente janë likuiduar rreth 97% të totalit të borxheve, afat i shlyerjes ky brenda një periudhe 2-vjeçare, 2015- 2017.
KLUBI
Në një komunikatë zyrtare enkas për gazetën, klubi i Tomorit ka treguar me imtësi çdo gjë për sa u përket këtyre borxheve. "I kemi dhënë pothuajse fund shlyerjes së borxheve, teksa na kanë ngelur vetëm 3% e tyre. Gati më shumë se 250 milionë lekë vetëm shpenzime të prapambetura nga viti 2010 deri në 2015. Të gjitha këto detyrime janë likuiduar gjatë një periudhe 2-vjeçare, falë mbështetjes së kryebashkiakut Petrit Sinaj, i cili e ka mbështetur dhe do vazhdojë ta bëjë një gjë të tillë edhe në vazhdim. Nuk duam të merremi se kush e ka fajin, por e rëndësishme është që tashmë do të kemi një buxhet të plotë që do t'i kushtohet vitit që vjen. Kemi bërë një punë të mirë në menaxhimin e skuadrës gjatë dy sezoneve të kaluara, ku edhe pse me borxhe, arritëm të ngjiteshim në Kategorinë e Parë dhe ta poziciononim skuadrën brenda pesë ekipeve të kreut", u tha fillimisht në deklaratën e dhënë për gazetën. THIRRJA
Më tej, klubi u ka bërë thirrje të gjithë sponsorëve që t'i bashkohen Tomorit dhe ta ngjisin këtë klub në majën e futbollit elitar. "Jemi të hapur për të hyrë në bisedime me çdo investitor serioz për të financuar klubin dhe për të bërë një bashkëpunim të mirë. Tashmë që çdo borxh është në zero, ne jemi plotësisht të bindur për një projekt madhor, i cili do të ringrinte edhe një herë emrin e madh si dikur. Tifozeria është një nga më të mirat e gjithë vendit tonë, teksa mbështetjen e tyre e kanë treguar edhe në Kategorinë e Dytë duke mos anashkaluar asnjë ndeshje të skuadrës së tyre. Besojmë se kemi bërë një punë të mirë në ndërtimin e skuadrës. Kemi vendosur në krye një trajner apasionant, i cili kërkon shumë dhe do gjithmonë më të mirën nga skuadra. U kërkojmë pa diskutim të gjithë lojtarëve që të impenjohen maksimalisht dhe të japin gjithmonë më shumë se maksimumin. Ne kemi qenë dhe do të vazhdojmë të mbetemi korrekt me rrogat, duke mos ia mohuar asnjërit kontributin dhe djersën në fushën e lojës", përfundon deklarata e klubit beratas.