Plori i sigurt: Ky, viti i Kastriotit për Superioren
Edhe pse nuk është pjesë e Kastriotit, Elvis Plori, ish-trajneri i krutanëve në sezonin 2015-2016, i ndjek me interes zhvillimet në Kategorinë e Parë, por kryesisht ato që ndodhin te Kastrioti. Prej dy vitesh, tekniku i njohur është trajner moshash tek akademia "Internacional Tirana". Në një intervistë për "Panorama Sport", trajneri Plori bën një analizë të përgjithshme të ecurisë së skuadrave. Profesor, si po ndiheni tek Akademia, teksa keni dy vite aty?
Ndihem shumë mirë dhe punoj me një dëshirë të madhe tek kjo akademi. Është e vetmja në Shqipëri që punon me projekt dhe strategji për futbollistët e rinj dhe të ardhmen e tyre, ku përqendrimi është që këta sportistë të luajnë jashtë vendit.
A ju mungon Kategoria e Parë?
Normal që më mungon, sepse atje kam shumë kujtime të bukura dhe adrenalina atje është më e madhe, por e kam e kam parë të arsyeshme të rri edhe këtë vit këtu. Më duket se nuk ka ardhur momenti im të shpreh atë që di të bëj më mirë.
U përfol sikur kishit kontakte me Luftëtarin, si qëndron e vërteta?
Është e vërtetë që unë kam qenë afër Luftëtarit, por zgjedhja që bëri presidenti Tavo ishte më e mira për arsyet e tij.
A i ndiqni zhvillimet e fundit në Kategorinë e Parë?
I ndjek me interes, por jo deri në detaje.
Drejtonit Kastriotin përpara dy sezonesh, çfarë ju kujton ajo kohë?
Kastrioti i dy sezoneve më parë, më kujton një ekip që u ndërtua për Superiore. Pastaj patëm heqje pikësh dhe ndryshim presidence. Gjë që e vuajtëm në fund, gjithsesi grupi dhe harmonia që kishte ajo skuadër ishte pika më e fortë.
Cili është kujtimi më i mirë dhe më i keq që keni nga kjo skuadër?
Kujtimi më i mirë, fitorja me Besëlidhjen, ku skuadra zbriti në fushë vetëm 10 minuta përpara. Ndërsa më i keqi, ndeshja e parafundit në Peshkopi me Korabin.
Një tjetër shkodran synon ngjitjen e Kastriotit në Superiore, a mendoni se do t'ia arrijë?
Jo vetëm shkodran, por edhe një shok dhe koleg shumë i ngushtë i imi. Kam besim të plotë te Samueli, i cili ka dëshirën dhe vullnetin për ta ngjitur në Superiore dhe them ky do të jetë viti për të rikthyer Kastriotin në Superiore.
Si e shikoni merkaton e bërë deri më tani nga krutanët? Merkato është mjaft e goditur, ka ndërthurje mes lojtarëve me eksperiencë dhe të rinjve të talentuar.
Kastrioti e nis në transfertë me Burrelin, skuadër që në kohën kur ishit ju trajner, barazimi i marrë ju hoqi mundësinë për t'u ngjitur. Çfarë u sugjeroni krutanëve?
Të kenë maturi në veprimet mbrojtëse dhe të jenë konciz në rastet që u jepen, pasi luajnë në një fushë ku nuk kalohet lehtë.
Cilën shihni si rivalin më të fortë të krutanëve?
Nuk duhet të nënvlerësohet asnjë skuadër, por di të them se Besëlidhja, Dinamo dhe Tërbuni mund të befasojnë.
Së fundi, a keni pasur ndonjë ofertë nga ndonjë ekip i së Parës?
Kam pasur, jo një, por disa në të dy grupet, por siç e theksova edhe më parë, akoma nuk jam i bindur për t'u rikthyer. LIRIDON PASHA