Berisha: Barazimi u vendos nga një moment i diskutueshëm
Etrit Berisha ka lënë të kuptohet se Shqipëria e hedhur në fushë në pjesën e parë nuk kishte funksionuar dhe se vetëm pasi u ndryshua skema e lojës, ajo filloi të luante përsëri. Pas ndeshjes, ai u shpreh për TVSH se kuqezinjtë kishin filluar të funksionin siç duhej vetëm pasi në fushë hynë Basha dhe Memushaj, duke u kthyer me rreshtimin e përdorur në periudhën e De Biazit. "Të them të drejtën ishte një pjesë e parë jo e mirë, por me ndërrimin e Bashës dhe Memushajt, ka ndryshuar loja jonë dhe filluam të kemi epërsi numerike në mesfushë, ndaj erdhën shanset. Si pasojë erdhi goli, që ishte i merituar në pjesën e dytë. Pastaj ishim duke udhëhequr dhe duhej të mbroheshim, por erdhi penalltia që dua ta shoh, se ishte e dyshimte. Nuk e di, edhe pse fola me gjyqtarin, nuk ndryshoi gjë. Mund të them se pasi barazuan, morën forcë dhe deshën ta fitonin ndeshjen, por ne u munduam me të gjitha forcat ta mbronim të paktën rezultatin, se një pikë është e vlefshme në këtë moment dhe u munduam që të krijonim mundësi kundërsulmi, por nuk ia arritëm", tha lojtari, që flet për ndryshimin e pozicionit të Alioskit në fushë, që ishte dje ndër më të mirët. "Mund të themi që në pjesën e dytë, Alioski ndërroi krahun dhe kishte mundësi më të mira të rrezikonte portën. Por ai vendim i gjyqtarit, apo një moment i diskutueshëm, vendosi barazimin. Përndryshe ne ishim kompaktë në mbrojtje dhe i bënim ballë me jo shumë vështirësi", vazhdoi portieri, që komenton ndeshjen ndaj Spanjës. "Për mua është ndjenjë e mirë, kur kam topa për të mbrojtur, kur kam shanse para portës. Është shumë më mirë kjo ndeshje sesa ndaj Lihtenshtejnit. Do të mundohemi ta përgatisim, pasi dihet edhe mundësia se sa kemi kapacitet për të luajtur me ekipet e mëdha, sidomos jashtë. Me siguri do të mundohem të jap gjithçka për të bërë më të mirën", mbylli Berisha.