Lushnja, 12 vite pa fituar ndaj Vllaznisë

Verdhejeshilët e nisin sezonin në Fier, mungojnë Pepa dhe Korreshi ndaj shkodranëve

Të dielën nis rrugëtimi i Lushnjës në Kategorinë Superiore. Me vonesën në rikonstruksionin e stadiumit dhe të detyruar të luajnë në Fier, lushnjarët brenda në "Myzeqe" shpresojnë të bëjnë më të mirën në start. "Bashkia e Lushnjës do të ndihmojë ekipin, trajnerët, futbollistët që punojnë me përkushtim për të realizuar objektivat e klubit", është shprehur kryebashkiaku-president Fatos Tushe. Lushnjarët janë në kulmin e përgatitjeve në kuadrin e ndeshjes premierë me Vllazninë që do ta luajnë në stadiumin "Loni Papuçiu" të Fierit. Me përjashtim të sulmuesit Brunild Pepa që është i dënuar, si dhe mesfushorit Erlind Korreshi i dëmtuar, të gjithë futbollistët e tjerë janë të gatshëm për teknikun Artan Bano. Skuadra ka vijuar përgatitjet në aneksin stërvitor pranë stadiumit "Roza Haxhiu" dhe atmosfera në kampin verdhejeshil është nën entuziazmin e rikthimit në Superiore.

Fierakët

Mbrojtësi Arbër Mone dhe mesfushori Agim Meto e nisin sezonin në shtëpi. Futbollistët fierakë, të cilët luajnë për Lushnjën, janë "vendës" në këtë ndeshje. Mbrojtësi i majtë Arbër Mone ka rinovuar me verdhejeshilët dhe ishte një nga protagonistët kryesorë të verdhejeshilëve. Mone ka një eksperiencë në Superiore dhe klubi verdhejeshil ka shprehur shumë besim te futbollisti fierak. "Po përgatitemi me besimin për ta nisur sezonin në mënyrën më të mirë", u shpreh Mone. Precedentët

Lushnja nuk fiton në shtëpi me Vl- lazninë që prej 12 vitesh. Suksesi i fundit i përket 12 marsit të vitit 2005, kur lushnjarët fitonin 2-0 ndaj kuqebluve me golat e Arlind Norës dhe Klodian Arbrit. Më pas, në pesë përballje të luajtura në "Roza Haxhiu", Lushnja njeh një barazim dhe katër humbje. Ndërsa, në stadiumin "Roza Haxhiu" do të punohet gjatë gjithë muajit shtator. Alban Alushi