Bebeto i kuq, një deputet nga Brazili për Partizanin
"Do sjell lojtarë që bëjnë diferencën në Superiore"
Pas bashkëpunimit me Luçiano Mox hin, presidenti i skuadrës së Partizanit, Gazmend Demi, do të ketë këshilltar një tjetër emër të madh të futbollit botëror. Bebeto, ish- futbollisti i Kombëtares braziliane dhe fitues i Kupës së Botës dhe aktualisht deputet në parlamentin e Rios, do të bashkëpunojë në të ardhmen me klubin e Partizanit. Gjatë prezantimit të djeshëm para mediave, 53vjeçari u shpreh: "Do të jem një këshilltar i presidentit Demi, i cili ka horizont të madh për futbollin. Biseduam shumë për gjithçka për sa i përket futbollit, me qenë se ai erdhi në Brazil, unë duhet t'ia ktheja këtë vizitë. Presidenti mendon shumë për të ardhmen e Partizanit. Ashtu sikurse kam folur kur isha futbollist me Deportivon, që neve na mungonte akademia dhe ia sugjeroja vazhdimisht presidentit të Deportivos. Duke dëgjuar presidentin Demi që do të bëjë një gjë kaq madhore, them se do të jetë shumë pozitive për të ardhmen e Partizanit. Nuk është e rëndësishme të bësh një skuadër për momentin, në qoftë se nuk ke një bazë për të ardhmen. Nuk është e rëndësishme të fitosh një kampionat, por të krijosh një të ardhme dhe të kesh një akademi dhe të fitosh shumë kampionate në vazhdim. Kam shumë besim që Partizani do të shkojë përpara", ka thënë fillimisht Bebeto.
Merkato - Një nga fushat në të cilat do të punojë Bebeto është merkato, ku pritet që të afrojë futbollistë cilësorë nga Brazili në Kategorinë Superiore. "Si futbollist kam qenë me mentalitet fituesi. Ashtu edhe kur i hyj biznesit, hyj gjithmonë për të fituar, nuk dua të zhgënjej asnjëherë. Eksperiencën time, duke fituar Kupën e Botës, shpresoj t'ia transmetoj edhe presidentit Demi. Mendoj se do të jetë e rëndësishme për të. Jam një mik, një këshilltar që do ta ndihmoj në të ardhmen. Gjithçka që kam bërë e kam bërë me shumë pasion, dedikim dhe punë. Jam në vëzhgim e sipër për të sjellë atë që i nevojitet më shumë Partizanit. Në këto moment kam sjell një lojtar brazilian Uarles, e kam bërë një hap. Është lojtar me cilësi të mira. Për momentin, nuk është në kontingjentin fizik më të mirë. Me kalimin e kohës do ta shikoni çfarë lojtari është. Dje ka folur edhe me trajnerin Iuliano, edhe me mua. Kemi pasur një bisedë ndërmjet nesh dhe kemi folur për të përmirësuar gjendjen fizike. Sugjerova trajnerin që të më thotë rolet që i nevojiten që unë t'i sjell lojtarë që të bëjnë diferencën në kampionatin tonë. U surprizova shumë nga presidenti kur ia kërkova këtë gjë, sepse ai më tha 't'i nuk ke punë me mua, por ke punë direkt me trajnerin Iuliano dhe stafin teknik'. M'u duk shumë e çuditshme se zakonisht presidentët jashtë ndërhyjnë shumë në aspektin teknik. Presidenti i ka dhënë dorë të lirë dhe besim stafit. Në Brazil, shumica e presidentëve bëjnë teknikun. Ai ishte shumë i qartë dhe më bëri përshtypje kjo gjë. Jam gati që ta ndihmoj Partizanin", ka vazhduar këshilltari.
Informacioni - I pyetur nga gazetarët në lidhje me njohjen që kishte në kampionatin shqiptar, Bebeto i sinqertë ka thënë: "Nuk kam pasur njohuri fare. Jam i surprizuar nga futbolli në Shqipëri. Ndoqa dhe Kombëtaren shqiptare dhe u surprizova nga mënyra se si u interpretua loja në fushë. As Partizanin nuk e njihja, por pas takimit me presidentin, tani di gjithçka për Partizanin. Njoh Iulianon, i cili ka luajtur në nivele shumë të larta në Itali", mbylli këshilltari i presidentit që shtoi se do të bashkëpunojë me Luçiano Moxhin dhe stafin teknik.