“Tomori, surpriza e së Parës”
"Kupa nuk është synimi ynë, por do të kërkojmë fitoren e parë"
Tomori u ka dhënë fund përgatitjeve p a r a s e z o n a l e . Skuadra beratase ka mbyllur të martën programin stërvitor në qytetin e Sarandës, ku për 12 ditë, futbollistët kanë zhvilluar një përgatitje intensive nën kujdesin e teknikut Dule. Krahas përgatitjeve, trajneri 29- vjeçar e shfrytëzoi këtë periudhë për të zhvilluar edhe disa takime miqësore, në mënyrë që të vëzhgonte më nga afër gjendjen e skuadrës. Në 4 miqësoret e zhvilluara, skuadra tregoi rritje takim pas takimit, duke konfirmuar edhe një herë se këtë sezon, Tomori do të luftojë për objektiva madhore, ndryshe nga ai i një sezoni më parë. Në një bisedë për "Panorama Sport", tekniku Dule është shprehur i lumtur për atë që treguan lojtarët gjatë kësaj kohe. "Kemi qëndruar për 12 ditë në Sarandë, duke marrë të gjitha ngarkesat e duhura, në mënyrë që të përballojmë pozitivisht fazën e parë të kampionatit. Realisht kam ngelur shumë i kënaqur, pasi kam marrë sinjale shumë pozitive nga futbollistët. Jam i bindur që kam formuar një grup me lojtarë tejet cilësorë dhe me financa modeste, që do të na bëjnë të jemi surpriza e këtij kampionati. Tashmë jemi plotësisht gati për të përballuar me sukses çdo kundërshtar. Nuk dua të zgjatem shumë në lidhje me merkaton, pasi kam sjellë në skuadër të gjithë lojtarët që më duheshin", tha Dule. KUPA E SHQIPËRISË
Tomori do t'u rikthehet sot përgatitjeve, në kuadër të sfidës ndaj Bylisit për Kupën e Shqipërisë, e cila është programuar të luhet më 13 shtator. Ndeshja e parë është vendosur të zhvillohet në stadiumin e Tomorit, mirëpo shtrimi i tapetit ka ngelur pezull, gjë që rrezikon zhvillimin e këtij takimi. Nuk dihet ende nëse impianti i stadiumit beratas do të jetë gati për këtë takim, apo qoftë edhe për ndeshjen e parë të kampionatit. "Ndeshja me Bylis duhet të vlerësohet maksimalisht, edhe pse nuk është në objektivat tona. Do të përpiqemi të tregojmë një lojë të bukur dhe të marrim fitoren e parë zyrtare. Nga lojtarët do të kërkoj përkushtim maksimal, pasi çdo kundërshtar nuk duhet ta ketë të lehtë me ne. Nuk kam vendosur nëse do të luaj me formacionin e parë apo të dytë, por e rëndësishme është që nuk do të tolerojmë kundërshtarin", përfundoi Dule.