Zhgënjen Argjentina, shtypi kryqëzon Mesin
“Ole”: Më i miri, në fushë s'mund të jetë thjesht një numër
Shërbente një fitore e Argjentinës në Bue nos Aires për t'u larguar nga vendi i pestë në kualifikueset e RUSI 2018 kundër Venezuelës, por në fund vjen vetëm një barazim zhgënjyes, që konfirmon sesa i vështirë do të jetë sprinti final i skuadrës së Sampaolit për një biletë direkte në Botëror. Në disavantazh në minutën e 51-të pas një goli të Murijos, bardhekaltërve iu desh një autogol i Feltsherit 3 minuta më vonë për të shmangur humbjen. Argjentina, pavarësisht "tredhëmbëshit" sulmues Mesi-Ikardi-Dibala, vuan sërish të shkojë te goli, edhe pse praktikisht sulmoi gjatë gjithë ndeshjes. Dhe në bankën e të akuzuarve nuk shpëton pa shkuar dikush, që nga kapiteni Mesi deri te juventini Dibala dhe interisti Ikardi. "Lojtari më i mirë në botë nuk mund të jetë thjesht një numër në fushë", shkruante "Ole". "Mesi nuk mund të luajë në një nivel kaq të dobët. Mungesa e lojtarëve të tjerë që flasin gjuhën e tij futbollistike në fushë nuk i heq përgjegjësitë. Leo luajti një
pjesë të parë të pranueshme. E nisi shumë mirë dhe menduam se do të shpërthente, por nuk shpërtheu", vazhdon "Ole". Ndërsa prova e kapitenit të Interit, preferuar titullar nga Sampaoli në vend të Higuainit (as nuk u grumbullua), mori vetëm një
notë kaluese. Në ndryshim nga ndeshja kundër Uruguait ( në të cilën arriti të prekte pak topa), Ikardi pati tri raste të pastra për gol në pjesën e parë, por nuk konkretizoi. Në pjesën e dytë ishte në vështirësi, por arriti të vendoste këmbën në aksionin që solli autogolin e Venezuelës dhe pretendoi edhe një penallti. Në 75' u zëvendësua nga Pastore. Shumë më e keqe prova e Dibalës, aq sa shumë në Argjentinë dyshojnë nëse ai mund të luajë përkrah Mesit pa penguar këmbët e kampionit të Barçës. I rreshtuar disi më pas, thuajse në rolin e mesfushorit, numri 10 i Juventusit nuk hyri kurrë në ndeshje dhe në minutën e 62-të u zëvendësua nga Benedeto, një ndërrim që u shoqërua me duartrokitje. "Ole" e vlerësoi ndeshjen e tij me fjalën e vetme: "I parëndësishëm".