Daja: Më kënaq vetëm rezultati, Duros ia jap kafen javës tjetër
Trajneri i skuadrës së Skënderbeut, Ilir Daja, ka pranuar faktin se skuadra e tij, edhe pse ka arritur të marrë tri pikë shumë të vlefshme në ndeshjen e djeshme ndaj Flamurtarit, nuk ka bindur me lojë. "E filluam mirë sepse primare për ne është fitimi i titullit kampion. Sot kishim një kundërshtar që, për mendimin tim, bëri gjithçka mirë, sidomos gjysmën e pjesës së parë na vuri në vështirësi. Edhe ne bëmë mirë, kishim raste, por jo shumë mirë, përveç rezultatit. Jemi me këmbë në tokë, sepse e dimë që mes paraqitjes së mirë në kampionat shkohet në Europë. S'kemi pse të jemi euforikë, pasi e arritëm objektivin në Europë dhe tani kemi grupet para. Sot (dje) kemi pasur pak probleme në ekuilibër, sepse mungesa e Osmanit, aktivizimi i Gavazajt jo në formë të mirë fizike, ndryshimi i formës së manovrës që nuk po na funksiononte, ndikuan në lojën tonë. Në momentin që kaluam të luanim si vjet dhe si në Europë, filluam ta balancojmë lojën dhe kishim raste të shënonim. Gjithashtu nuk i lamë situata kundërshtarit në pjesën e dytë", ka thënë trajneri për "Supersport", që thumbon edhe kolegun e tij të Flamurtarit, Shpëtim Duro pas deklaratave të dhëna nga ky i fundit se kishin shtëpitë afër. "Duros ia jap kafen javën tjetër se nuk kemi më ditë pushimi, pasi nisim përgatitjet për në Kiev", ka thënë Daja. PROBLEMET - Korçarët kanë shfaqur disa probleme në mbrojtje gjatë ndeshjes së djeshme, sidomos kur skuadra dilte në kundërsulme të shpejta. "Gjatë momentit që bënim manovër sulmuese nuk kishim shkallëzimin e duhur, por kjo erdhi për shkak të modulit të lojës, të cilin pak e kemi përdorur dhe do kohë që të përshtatemi. Nuk jemi euforikë, ka entuziazëm, por ai nivel entuziazmi që jemi me këmbë në tokë. Kishim probleme në ndërtimin e sulmit dhe momente nervozizmi që nuk duhet ta shprehim me eksperiencën që kanë lojtarët sepse prishen ekuilibrat. Kjo u vu re, sepse në ato situata i dhamë mundësi Flamurtarit të na rrezikonte", ka vazhduar trajneri. KUNDËRSHTARI - Dje në stadium kanë qenë të pranishëm edhe përfaqësues të Dinamos së Zagrebit, kundërshtari i Skënderbeut, në ndeshjen e Ligës së Europës. "Nuk ka lidhje ndeshja sot me atë që do të bëjmë në Kiev. Sot duhet të fitonim me patjetër, përballë kishim një Flamurtar që nuk e njihnim. Nuk do bëjmë asnjë ditë pushim, sepse nesër (sot) fillojmë përgatitjet për ndeshjen ndaj Dinamos. Edhe pse vëzhguesit e kundërshtarit kanë mbajtur shënime sot, nuk do jetë e njëjta gjë në Kiev, nuk do të ketë ngjashmëri as në vendosje, as në manovër", ka mbyllur Daja.