Duro, kritika Alveshit: S'po na nxjerr nga situata!
"Po të mos kishim pësuar në start, gjërat do ishin ndryshe"
Për trajnerin e Fla murtarit, Shpëtim Duro, goli i pësuar që në fillim të ndeshjes ka ndikuar jo pak në humbjen e skuadrës së tij. Në intervistën e dhënë për "SuperSport", trajneri nuk i ka kursyer kritikat ndaj Alveshit, që, sipas tij, duhet të marrë më shumë përgjegjësi.
Duro, e nisët me humbje sezonin, ju vjen keq?
Vështirësia dihej ndaj një kundërshtari si Skënderbeu që kishte një ritëm të mirë ndeshjesh gjatë verës. Ishte një kundërshtar i vështirësisë së lartë. Kisha besim te skuadra ime, por siç u pa, ta fillosh lojën me disavantazh 0- 1, me një pakujdesi që në aksionin e parë, nuk është e lehtë dhe vështirësia u rrit, aq më shumë ndaj Skënderbeut. Pas pushimit ishim pranë barazimit dhe, në disa momente, luajtëm si të barabartë duke e vënë në vështirësi Skënderbeun. Nuk arritëm të shënonim se do të ishim në situatë tjetër nëse do të gjenim rrugën e rrjetës.
Ç'mund të na thoni për lojën e ekipit tuaj?
Pas shënimit të golit të dytë mbaroi historia. Largova Sidiben, edhe pse treshja po luante shumë mirë, duke luajtur presion të lartë. Ishin të tre me të verdhë, u detyrova të largoja Sidibe, të tërheq Pollozhanin, i cili nuk kishte ritmin e pjesës së parë. Këtë e pashë qartë. Pastaj goli i dytë ishte pakujdesi, pa dyshim që i dha qetësi Skënderbeut dhe them që, në ato momente, ndeshja u mbyll.
Flamurtari ka afruar shumë lojtarë, por a janë ata në nivelin e duhur për të përballuar sezonin?
Lojtarët që kam sjellë në skuadër, gradualisht do të vijnë duke e justifikuar. Sigurisht
që pres akoma më shumë, madje edhe portieri bëri ndeshje të mirë. Mirëpo, e thashë që ishte një sfidë që nuk duhej të fillonte kështu, ndaj një kundërshtari me nivel që ta vështirëson shumë punën. Por, në pjesën e parë ishin Alvesh e Xhufo që po të shënonin, do të ndryshonte situata.
Jeni i kënaqur nga lojtarët e huaj?
Kemi gjashtë të huaj, normale të kesh dy në rrotacion. Sidibe, siç e patë, është lojtar me cilësi të mira, por e thashë që u shqetësova që kishin të verdhë, iu frikësova të kuqit. E kam thënë që pres më shumë nga Alvesh, të jetë më i rrezikshëm për kundërshtarin. E patë që në shumë momente duhej të rrezikonte, nuk e ndërrova se kisha shpresa, por vazhdoi duke humbur shumë topa. E largova Sidiben me keqardhje.
Keni diçka për Danilo Alveshin?
Nuk di çfarë të them për të, qëllimisht gjithmonë e kam përmendur, për ta vënë në pozita pune, jo se nuk ka impenjim, por mund të jetë cilësi individuale. E patë një sulmues që bënte diferencën ( Soue i Skënderbeut), në dy momente ishte ai protagonist, e nxori golin nga hiçi, këta janë lojtarë që të shpëtojnë. Ka të tjerë që krijojnë shumë volum loje, por nuk japin rendimentin e duhur.