Iuliano: Nuk dua të tregoj përralla, Partizani për titull
"Paraardhësit? Dua të shkruaj historinë time"
Pas një pune njëmu jore, Mark Iuliano, në konferencën e djeshme për shtyp, ka treguar Partizanin e tij, që e njeh mirë dhe ka besim në arritjen e objektivit. Ai ka folur edhe për Laçin, që e njeh pak, si dhe formacionin që ka përgatitur për këtë takim. Iuliano kërkon të shkruajë historinë e tij te Partizani pa iu referuar paraardhësve, si dhe ka pohuar se nuk e ka problem menaxhimin e konkurrencës në grup.
E nisni sezonin ndaj Laçit, sa e njihni këtë kundërshtar?
Detyra ime është që të njoh skuadrat kundërshtare, edhe Partizanin. Sigurisht, kemi pasur pak vështirësi për të studiuar se si luan Laçi, sepse ka pësuar shumë ndryshime në sezonin e ri, si dhe nuk kemi pasur pamje nga miqësoret që kanë zhvilluar. Fatmirësisht, bashkëpunoj me një staf, si shqiptar, ashtu edhe italian, i cili më ka mundësuar të gjitha informacionet e mundshme për këtë skuadër. Laçi është një skuadër mjaft e mirë, ka mjaft elementë cilësorë brenda saj, një trajner me përvojë, por ne jemi të vendosur të japim më të mirën, për ta nisur ashtu si duhet kampionatin.
Si është përgatitur Partizani për këtë përballje? A e keni formacionin të plotë për këtë ndeshje?
Skuadra mezi po e pret fillimin e sezonit të ri futbollistik. Kemi zhvilluar një fazë përgatitore mjaft të mirë, e cila do të na mundësojë për të zhvilluar një kampionat shumë pozitiv. Natyrisht, kemi edhe ndonjë problem fizik të ndonjë lojtari, por me grupin që kam në dispozicion do të bëjmë më të mirën ndaj Laçit e në vazhdim.
A ju kanë informuar se Laçi është kundërshtar i tillë
që sezonin e kaluar e nxori Partizanin nga gara për titull, me barazimin në "Selman Stërmasi", fazën e katërt? A ka vend për hakmarrje?
Sigurisht, jam i bindur që ka lojtarë, të cilët nuk e kanë harruar atë ndeshje, atë zhgënjim, por mendoj se e rëndësishme është që të japim më të mirën në fushë. Ky është një kampionat i ri dhe në skuadër janë afruar mjaft elementë të tjerë. Partizani, ashtu siç ka nisur sezonet e tjera, do të hyjë në garë si një skuadër e madhe e futbollit shqiptar. Pra, do të bëjmë gjithçka për të fituar çdo ndeshje, javë pas jave. Nëse kundërshtari do të na vërë në vështirësi, apo nëse nuk arrijmë rezultatet e duhura, do të vihemi në lëvizje për të përmirësuar gjëra që çalojnë. Edhe pse shpresoj që kjo e fundit të ndodhë sa më pak herë.
Thatë se e keni pasur të vështirë të merrni informacion për Laçin. Sa e njeh tashmë
Mark Iuliano Partizanin?
E njoh mjaft mirë skuadrën që po drejtoj. I njoh mjaft mirë lojtarët me të cilët kam punuar gjatë gjithë kësaj periudhe, sidomos lojtarët shqiptarë. Lojtarët kanë kuptuar çdo gjë që unë u kam transmetuar në përgatitjet verore, për sa i përket lojës që do të bëjmë, apo skemave. Jam shumë i kënaqur, sepse lojtarët e kanë përthithur shpejt atë që u kam transmetuar.
Merkatoja e ka rritur konkurrencën te Partizani. Sa e vështirë do të jetë që ju të menaxhoni situatën, sepse do të ketë edhe të pakënaqur?
Për mua është shumë e lehtë që të hedh në fushë 11 titullarët, pasi kam në dispozicion lojtarë shumë cilësorë, mjaft inteligjentë. Edhe ata vetë e kanë kuptuar se gjithçka ka ndryshuar. Pra, ka hyrë një frymë e re në skuadër, në kuptimin që një skuadër e madhe nuk mund të ketë në dispozicion
12 apo 13 lojtarë. Në fushë do të luajnë titullarë ata lojtarë që janë më cilësorë, paraqiten më mirë në stërvitje, por kjo do të varet edhe nga kundërshtari që do të kemi përballë.
Mund të dimë diçka rreth formacionit për sfidën ndaj Laçit?
Nuk është fare problem për formacionin në këto momente, atë do ta shikoni nesër (sot) në fushë.
Edgar Çani do të jetë i grumbulluar për këtë takim?
Jo. Për ndeshjen e parë nuk do të jetë në dispozicion, pasi vjen nga një operacion. Tashmë po vijon fazën e riaftësimit. Gjithçka po ecën pozitivisht, por për ndeshjen ndaj Laçit nuk do të jetë gati. Gjendja e tij fizike po vjen gjithnjë në përmirësim, programi stërvitor i Çanit ka qenë disi specifik në raport me atë të skuadrës. Mendoj se ai do të jetë i gatshëm për ndeshjen e Kupës, që do të luhet në mesjavë.
Në stërvitje kemi parë që e ndryshoni shpesh formacionin. Kush do të jetë titullar ndaj Laçit, Batha apo La Kamera?
Nesër do të luajë La Kamera. E doni edhe pjesën tjetër të formacionit?
Lojtarët e rinj, kryesisht ata që vijnë nga Italia, a e njohin realitetin e kampionatit shqiptar?
Çfarë doni të thoni me realitet i futbollit shqiptar? Si kudo, do të luajnë 11 kundër 11 lojtarëve. Lojtarët që kanë mbërritur kanë ardhur nga vende të ndryshme të Europës, me përjashtim të Xhixhiuas. Ata kanë ardhur këtu për të rritur cilësinë, por edhe për të pasur konkurrencë të madhe me grupin e lojtarëve shqiptarë, që unë kam gjetur në ekip.
Sa e vështirë është të garoni me Skënderbeun europian dhe Kukësin kampion?
Duhet të kuptojmë diçka, që sa më shumë skuadra të jenë rivale për titull, aq më mirë do të jetë për nivelin e futbollit shqiptar. Edhe Partizani, nëse do të rritet në cilësi dhe rezultate, ka nevojë që të përballet me skuadra mjaft të forta. Ju e dini më mirë se unë, se në të shkuarën Partizani nuk është se ka patur vështirësi me skuadrat pretendente për titull, por e ka humbur kampionatin pikërisht ngaqë nuk ka marrë pikët me skuadrat e vogla. Të gjitha skuadrat, që dalin kampione në botë, e arrijnë këtë duke u marrë maksimumin e pikëve të vegjëlve. Personalisht, do ta kisha më të lehtë për të përgatitur një ndeshje përballë Kukësit apo Skënderbeut, pasi vetë lojtarët karikohen duke ditur rëndësinë dhe nivelin e kundërshtarit. Puna ime më e vështirë do të jetë që me skuadrat e vogla të kemi të njëjtin mentalitet si kundër pretendentëve. Mos të tolerojmë në asnjë moment.
Çdo fillimsezoni është thënë se Partizani do të dalë kampion, por nuk ia ka arritur. A do të jetë ky viti i duhur për t'i dhënë fund pritjes 24vjeçare?
Përtej numrave, viteve që ka pa titull, duhet patjetër që Partizani ta fitojë kampionatin. Përtej batutës, ne po punojmë gjithmonë për të përmirësuar atë që është bërë deri tani. Pikërisht për të përmirësuar atë vend të dytë, që skuadra ka arritur dy vitet e fundit, do të përpiqemi të bëjmë më të mirën, pasi jemi të vetëdijshëm për objektivin që na pret. Do të bëjmë gjithçka për ta fituar titullin kampion. Nuk dua të tregoj përralla, por synimi është objektivi madhor, titulli.
A keni pasur ndonjë kontakt me Agostinelin apo Sormanin, paraardhësit tuaj italianë?
Jo. Kam folur me njerëzit që kanë punuar këtu prej vitesh. Ata më kanë transmetuar se teknikët e mëparshëm italianë kanë lënë përshtypje mjaft të mira këtu. Nuk mund të flas për ata, sepse emri im është Mark Iuliano dhe dua të shkruaj historinë time. Do të përpiqem të bëj më të mirën.