Besëlidhja nuk di të fitojë, Turbina është në formë
Takimi miqësor mes Besëlidhjes dhe Turbinës ka nisur i qetë, ku të dyja skuadrat luajtën të kujdesshme për të studiuar lojën e njëratjetrës. Të parët që e kanë shkelur zonën e rreptësisë janë futbollistët e Besëlidhjes me një sulm të shpejtë të organizuar majtas nga Ndreca, por mbrojtja mike e ka zmbrapsur rrezikun. Deri në të 20-ën loja u zhvendos në qendër ku të dyja skuadrat organizuan ndonjë sulm sporadik, por pa rrezik për portat respektive. Janë miqtë cërrikas që këmbëngulin, por mbrojtësit Dibra e Dore janë në lartësinë e duhur duke i shmangur rreziqet e sulmit cërrikas. Në të 39-ën janë përsëri miqtë cërrikas që sulmojnë me anë të Agalliut dhe Sallakut ku ky i fundit fiton një penallti. Nga pika e bardhë është Sallaku që godet dhe shënon 0-1. Pas pësimit të golit vendësit riorganizohen dhe pas dëmtimit të mesfushorit lezhjan Hepaj e zëvendëson shkodrani Dyca që debutoi me fanellën e Besëlidhjes dhe në të 38-ën ia doli që të barazonte. Fraksioni i dytë ishte edhe më i fortë, ndonëse të dyja skuadrat bënë ndërrime të shumta. Në të 50-ën janë miqtë që sulmojnë me shpejtësi, por nuk ia dalin të dyfishojnë. Pas disa sulmesh, të dyja skuadrat e ulën disi ritmin, por shumë shpejt lezhjanët sulmojnë dhe në të 54-ën ishte Ndreca që nga e majta godet shtyllën cërrikase. Në të 60-ën janë përsëri lezhjanët që sulmojnë dhe i sapofuturi Miloti nuk heziton, por gjuan në kuadrat duke e mposhtur portierin mik dhe 2-1. Në të 74-ën është Qori për miqtë që provon nga 30 metra largësi nga e djathta e sulmit dhe topi qeth traun e portës lezhjane. Në të 85ën, Turbina sulmon dhe gjithçka finalizohet me sukses nga Agalliu që barazon. Me këtë gol u mbyll i gjithë takimi me shifra të barabarta 2-2. Pas ndeshjes, trajneri i Besëlidhjes, Anteu Pepaj u shpreh: "Me lojën e skuadrës jam i kënaqur deri diku, pavarësisht barazimit, pasi e kam theksuar edhe herë të tjera për mua në miqësore më vlen performanca e skuadrës dhe e futbollistëve në veçanti se rezultati. Jam i kënaqur pasi pjesa e dytë ishte më e mirë se e para dhe kjo tregon se skuadra është në rritje. Tani e kemi mbyllur fazën përgatitore dhe jemi të gatshëm që të nisim sezonin futbollistik me objektiva të qarta". P.Gjikola
Trajner: