Makthi i ri i Bajernit quhet... Hofenhaim
Skuadra e Naglesman thyen kampionët gjermanë të Ançelotit Dopieta e Ut u siguron bluve triumfin e 19-të në Sinshaim
Në sfidën e javës së tretë të sezonit të ri të Bundesligës, kampionët gjermanë të Bajernit janë ndalur në Hofenhaim me rezultatin 2-0 për skuadrën e teknikut Julian Nagelsman. Edhe pse italiani Karlo Ançeloti premtoi ndryshime në taktikat e bavarezëve, sikurse në sezonin e kaluar ata nuk arritën të mposhtin Hofenhaimin. Goli i parë i kundërshtarëve të Hofenhaimit është pritur me mjaft kritika, sidomos nga mbrojtësi Mats Humels, ku pritej të ishte një vendim i gabuar i gjyqtarit dhe moviolës elektronike, e cila edhe këtë javë ka pasur probleme në sistemin e linjave të pozicionit jashtë loje. Për bavarezët, skuadra e Nagelsman është kthyer në një rival tepër potent, i cili ka mbetur edhe kësaj radhe për të 19-ën herë, i pamposhtur në fushën e tij. Megjithatë, në skuadrën e kampionëve gjermanë, një prej çështjeve më të diskutuara të javës së fundit, ka qenë edhe aktivizimi i zëvendëskapitenit Tomas Myler. Në këtë sfidë, tekniku italian Karlo Ançeloti i ka dhënë atij më tepër avantazh, edhe pse për dyshen "Robbery" italiani ka vendosur t'i lërë të shohin sfidën nga stoli për t'i aktivizuar ata në pjesën e dytë të sfidës. Për Hofenhaimin, heroi i kësaj sfide ka qenë Mark Ut, që ka shënuar dopietën, e cila i siguroi fitoren e 19-të në fushën e saj skuadrës së Nagelsmanit. Goli i tij i parë është shënuar në minutën e 27-të të pjesës së parë duke fituar edhe dominimin e pjesës më të madhe të lojës. Raste kanë pasur edhe kampionët gjermanë me anë të bomberit polak, Robert Levandovski, i cili ka tentuar një moment të barazojë rezultatin, por nuk ka arritur të gjejë të papërgatitur portierin Bauman. Në pjesën më të madhe të lojës, skuadra e Hofenhaimit është treguar shumë e tërhequr në mbrojtje për të ruajtur rezultatin e avantazhit. Ndërsa në kampin tjetër, Ançeloti nuk ka arritur t'i mbyllë hapësirat në mbrojtje duke u krijuar një avantazh të madh kundërshtarëve. Edhe për zëvendëskapitenin Tomas Myler, tentativat për të shënuar nuk kanë munguar, ndonëse nuk ka mundur të gjejë hapësirat e duhura në portën e Bauman. Drejt përfundimit të sfidës, Ançeloti ka aktivizuar edhe Hames Rodrigez, i cili është rikthyer në Mynih vetëm tri ditë më parë pas sfidave me kombëtaren kolumbiane, por edhe ai nuk ka mundur të ndihmojë skuadrën bavareze, e cila u mposht sërish në Sinshaim.