Josa në Kosovë, emërohet drejtor teknik te Prishtina
Trajneri: Dua të bëj diçka ndryshe jashtë vendit
Mirel Josa është prezantuar gjatë pasdites së djeshme si drejtori i ri teknik i klubit të njohur kosovar, FC Prishtina. Ish-trajneri kampion i Skënderbeut ka arritur një akord me klubin kryeqytetas pas kontakteve të vazhdueshme me presidentin Remzi Ejupi. Josa e pranoi këtë sfidë të re, për faktin se dëshironte të bënte diçka më ndryshe nga ajo që kishte përjetuar në Shqipëri në vitet e fundit. Gjatë prezantimit para mediave kosovare, trajneri që mbylli sezonin 2016-2017 te Tirana u shpreh i lumtur për këtë aventurë. "Normalisht, kur më është bërë propozimi nga kryetari Ejupi për të ardhur, për ta ndihmuar me situatën në klubin e Prishtinës, unë u tregova i gatshëm. Jo për faktin se unë isha i lirë, por sepse dua të bëj një gjë më ndryshe jashtë vendit tim, pavarësisht se brenda për brenda Shqipërisë jemi. Do të mundohem që me të gjitha mundësitë e mia të ndihmoj komplet klubin në plotësimin e objektivave që ka. Objektivat m'i bëri të qarta kryetari dhe uroj që punën time ta bazoj në sinqeritetin që kemi ndërmjet palëve, që gjithçka të ecë sa më mirë, duke futur këtu edhe futbollistët dhe stafin teknik, qoftë edhe stafin drejtues të klubit. Besoj që çdo gjë do të shkojë mirë dhe më vonë vazhdimësia e gjithsecilit do të shihet në bazë të rezultateve dhe sinqeritetit në mes palëve, unë me klubin. Gjithçka të jetë reciproke, sepse unë kështu jam mësuar të punoj në çdo klub që kam qenë dhe në këtë mënyrë të bëj punën në vazhdimësi", ka thënë Josa në prezantimin e tij. SI TRAJNER
I pyetur rreth idesë për të marrë më vonë drejtimin e skuadrës si trajner, Josa ka bërë të qartë se ekipi është nën urdhrat e trajnerit Arsim Thaçi dhe priste që të bashkëpunonte ngushtë me të. "E kam ndjekur skuadrën, e cila ka lojtarë cilësorë brenda. Unë njihem edhe me trajnerin Thaçi, sepse e kemi kryer së bashku kursin e UEFA PRO dhe kam mendim shumë të mirë për Arsimin. Nuk do t'i ndërhyj në punën e tij si trajner. Në qoftë se do të kërkojë ndonjë sugjerim, do ta ndihmoj, sepse ai e njeh më mirë situatën brenda grupit dhe gjendjen aktuale. Çdo trajner merr përsipër të gjitha, duke i bërë planet stërvitore vetë. Por, duke e pasur një konsensus bashkë në këtë drejtim, atëherë gjithçka do të bëhet në të mirë të klubit", deklaroi Josa. Ndërsa presidenti Remzi Ejupi u shfaq shumë i lumtur që kishte arritur të afronte një figurë me shumë eksperiencë në futbollin shqiptar. "Me ardhjen e Josës, ne besojmë që do të forcojmë organizimin tonë, duke e marrë parasysh që Mireli është prej trajnerëve më të mirë. Besoj që eksperienca e tij në kampionatin shqiptar dhe në arenën ndërkombëtare me Skënderbeun do të na ndihmojë shumë në të ardhmen që Prishtina të arrijë aty ku e ka vendin", deklaroi Ejupi.