Preiti: Kam punuar me Kuadradon që u shit 40 milionë euro
Partizani ka prezantuar dje drejtorin e ri sportiv të klubit, Antonelo Preiti, i cili në të shkuarën e ka kryer këtë detyrë në disa klube italiane, ku spikat puna e tij te Parma. Italiani, i përzgjedhur nga Moxhi si njeriu që do të drejtojë merkaton e të kuqve, ka folur përpara mediave duke treguar punën e bërë deri tani dhe karrierën e tij të gjatë në futboll. Në fjalën hyrëse, Preiti pohoi se ndihej i lumtur që është bërë pjesë e një klubi si Partizani dhe ka falënderuar presidentin Demi dhe Luçiano Moxhin që e përzgjodhën në detyrën e re. Ai vlerësoi organizimin e klubit dhe tha se do të jetë 24 orë i angazhuar me Partizanin, pasi këtë praktikë e ka përdorur kudo që ka punuar. Preiti pohoi se ka pasur kontakte edhe më herët me futbollin shqiptar, ku përmend Andi Lilën te Parma. Mes të tjerash, në prezantim ai tha: "Nuk më pëlqen shumë fjala 'unë', më pëlqen fjala 'ne'. Të gjithë bashkë mund të realizojmë një objektiv të madh". Pas fjalës prezantuese, Preiti u ka dhënë përgjigje pyetjeve të gazetarëve.
HUMBJA ME LAÇIN - "Ky është futbolli. Bën ndeshjen për 90 minuta, e menaxhon dhe me dy kundërsulme të kundërshtarit mund të humbësh. Do ta quaja një aksident të momentit, por ajo që e rëndësishme është se skuadra u shfaq me personalitet. Humbja nuk i pëlqen askujt, por ndeshja e parë nuk ndryshon objektivat". AFRIMET NË MERKATO - "Kam një eksperiencë të madhe me lojtarët e huaj që vijnë për herë të parë në një klub. Kam pasur të bëj me lojtarë si Kuadrado tek Udineze. Në vitin e parë, ai kishte shumë vështirësi, sepse vinte nga Amerika e Jugut, thuajse nuk luajti fare dhe shkoi në huazim në një skuadër të vogël si Leçe. U kthye prapë tek Udineze dhe, një vit më pas, u shit për 40 milionë euro. Ky është një shembull. Kur një lojtar i ri afrohet pranë një klubi, jo të gjithë arrijnë të ambientohen. Kjo është diferenca kur flitet për një futboll të organizuar. Në shumë raste atë që nuk e sheh në një muaj, mund ta shohësh në muajt dhe vitet në vazhdim".
EDGAR ÇANI - "Është folur shumë për atë, një lojtar të cilin e njihni shumë mirë, pasi ka qenë pjesë e kombëtares shqiptare. Unë e njoha në Itali në shumë skuadra ku ka luajtur. Ai është një lojtar shumë i rëndësishëm për Partizanin dhe kur e morëm ishim të bindur, siç jemi tani, se do të jetë qershia mbi tortë. Pasi mbylli sezonin e kaluar në Pizë, bëri një ndërhyrje për pastrimin e meniskut. Kohët e riaftësimit ishin pak më të gjata sesa parashikohej. Kemi bërë një punë graduale gjatë grumbullimit në Kasha, duke u munduar të mos e sforconim më shumë se duhej. Kjo na dha të drejtë, edhe pse shpesh nuk u stërvit me normalitet. Mendoj se Çani, në ndeshjen e Kupës, do të jetë në dispozicion të trajnerit Iuliano".
PRITSHMËRITË - "Unë pres shumë nga 25 lojtarë, jo nga 3 lojtarë. Të jap një shembull të sezonit të kaluar, për vështirësitë e Ekubanit në fillim. Mendoj se e nisi nga pankina. Ne mendojmë se kemi në dispozicion një grup të mirë për objektivin tonë. Ky është një problem që trajneri nga java në javë e menaxhon grupin dhe ata që do të zbresin në fushë kundër rivalëve. Ka disa rregulla, mund të luajnë vetëm 4 të huaj, ne shpresojmë që gjatë rrugës të vendosim në kushtet e duhura ata lojtarë që kanë ardhur për të dhënë maksimumin në Superiore. Por si më ka mësuar eksperienca, duhet të kesh edhe durim, sepse me siguri nguti nuk sjell rezultate të mëdha". ÇËSHTJA "HOXHA" - "Unë mendoj se harmonia dhe atmosfera e grupit është e duhura. Ka konkurrencë, në fushë shkojnë 11 lojtarë. Pankina nuk është e gjatë, por maksimumi janë 18 futbollistë për ndeshjen dhe luajnë 4 lojtarë të huaj. Ne kemi 25 lojtarë, ndaj në mënyrë të pashmangshme bëhen zgjedhje teknike, që mund të penalizojnë për një javë një lojtar dhe një tjetër në atë pasardhëse. Është normale që duket se klubi nuk ka harmoni, por ky ka shumë dëshirë, është shumë profesional. Ne presim shumë nga çdo lojtar i veçantë".
KUNDËRSHTARËT - "Asnjëherë të mos kemi frikë në jetë. Shumë respekt për kundërshtarët. Nuk jam një person që nuk njeh dhe s'ka dëshirë të njohë, kam gjithmonë dëshirë të mësoj. Kam uri të mësoj për futbollin edhe pas 30 viteve në futboll. Skënderbeu, Kukësi e Partizani ishin ekipet më të mira. Skënderbeu tregoi me kalimin në Ligën e Europës cilësinë e tij. Laçi e tregoi duke luajtur me ne se kishte organizim të mirë. Unë mendoj se shumë njerëz flasin dhe nënvlerësojnë potencialin e futbollit shqiptar. Unë nuk e kam nënvlerësuar sepse njoh shumë futbollistë shqiptarë në Europë, të cilët po paraqiten mjaft mirë. E tregoi Kombëtarja para Panuçit me De Biazin, e tregoi me kalimin e turit edhe Skënderbeu. Ky është një futboll në rritje dhe, nëse je i vëmendshëm, i përqendruar e i përulur dhe, nëse nuk nënvlerëson askënd në çdo ndeshje, mund të arrish objektivat.
Ndaj me shumë dëshirë duhet përballuar çdo ndeshje. Edhe pse ndonjë skuadër mund të ketë mangësi cilësore, me siguri është e organizuar mirë, sidomos ka gjithmonë dëshirë të tregojë në ndeshjet në Tiranë se mund të na vendosin në vështirësi. Frikë nga askush, respekt për të gjithë".