Kastrioti nis sezonin në Kupë, Lila: Nuk zhgënjejmë

Qendërmbrojtësi i Kastriotit, njëherazi edhe kapiteni i skuadrës, Vilson Lila, shprehet optimist për Kastriotin e këtij sezoni: "Skuadra e këtij sezoni është më e mira që Kastrioti ka pasur në Kategorinë e Parë. Të gjithë lojtarët e afruar, por edhe pjesa më e madhe e atyre që kanë qëndruar nga sezoni i shkuar, kanë eksperiencën e duhur, pasi në karrierën e tyre kanë ngjitur disa ekipe në Superiore. Edhe këtë sezon e shoh si të mundshëm arritjen e këtij objektivi, pasi, krahas cilësisë që ka skuadra, djemtë kanë mentalitet fituesi dhe më kryesorja është harmonia, e cila është pika jonë e fortë", u shpreh fillimisht kapiteni. I pyetur për ndeshjen e Kupës ndaj Vllaznisë, Lila tha: "Do ta vlerësojmë ndeshjen e Kupës, pasi është shumë e rëndësishme në aspektin psikologjik të ekipit për vazhdimësinë në kampionat. Do ta vlerësojmë edhe për vetë faktin që luajmë përpara tifozërisë sonë dhe prezantimi që do të bëjmë përpara tyre të jetë i kënaqshëm", ka mbyllur Lila. Uniforma - Merkato është vetëm njëra anë pozitive e krutanëve, pasi suksesi kërkon edhe një imazh serioz. Kështu, krutanët janë pajisur dje me uniformat e reja, dizajnuar dhe prodhuar nga kompania "Macron". Uniforma e re e krutanëve është e kuqe me anësore të bardha dhe me disa kuadrate të imëta të zeza, ashtu siç gjithmonë skuadra i ka pasur traditë edhe kur ishte në Superiore. Uniformat e reja do të prezantohen sot në ndeshjen ndaj Vllaznisë, ndërsa drejtuesit janë munduar që të ruajnë ngjyrën e kuqe karakteristike të skuadrës së Kastriotit, por me një dizajn më të veçantë. Liridon Pasha