PSG trondit Sëlltikun me rezultatin 0-5

Nejmar, Kavani e Mbape, heronjtë e francezëve

Skuadra e kryeqytetit francez, PSG, ka arritur një fitore të thellë në sfidën e saj të parë për Champions Leaguen ndaj rivalëve të Sëlltikut me rezultatin 0-5. Në formacionin e teknikut Emeri kanë qenë të pranishëm yjet si Mbape, Nejmar dhe Kavani, të cilët kanë shfaqur performanca të jashtëzakonshme në përballjen ndaj skocezëve të trajnerit Brendan Roxhers. Skuadra franceze ka qenë dominante që prej fillimit të sfidës, por përgjatë lojës tekniku Emeri e ka parë të arsyeshme të bënte edhe

disa zëvendësime për ta mbajtur skuadrën sa më të freskët gjatë të gjithë kësaj ndeshjeje. I pari, i cili ka rrezikuar, ka qenë Nçam i Sëlltikut me një goditje drejt portës së Areolës, por nuk ka arritur ta kërcënojë

atë. Në minutën e 19-të, pas një asisti të dhënë nga Kavani, blerja më e shtrenjtë e historisë, Nejmar, shënoi golin e parë të PSG-së. Megjithatë, skuadra franceze nuk është mjaftuar me kaq. Vetëm 14 minuta nga shënimi i golit të parë, ishte radha për blerjen më të re të PSG-së, Kilian Mbape, i cili, pas një topi të humbur nga Kavani, arriti të gjente hapësirën për të shënuar golin e dytë. Pesë minuta para përfundimit të pjesës së parë, Kavani ka shënuar golin e tretë për francezët, të cilët kanë vazhduar të dominojnë lojën. Edhe pse fati i sfidës u vendos që në pjesën e parë, në atë të dytë, skuadra e Sëlltikut i ka falur një gol PSG-së me anë të autogolit të Lustig. Dy minuta pas tij, Kavani mbyll sfidën me golin e pestë të PSG-së.