Zidan: Kristiano gati, si gjithnjë jemi favoritë
Zizu: Nga ne pritet shumë, jemi mësuar me presion
Zinedin Zidan, tekni ku i Realit të Madrid it foli në konferencë për shtyp në vigjilje të sfidës së sotme ndaj qipriotëve të Apoelit të Nikosisë. Trajneri francez dhe skuadra e tij duan të mbrojnë titullin e fituar në finalen e Kardifit ndaj Juventusit: "Jemi të gjithë shumë të lumtur që rikthehemi të luajmë në Ligën e Kampioneve, vërtet jemi kampionë në fuqi, por ndaj Apoelit gjithçka nis nga zero. Ky kompeticion na magjeps, megjithëse e dimë që na presin sfida shumë të vështira".
Barazimet e këtij fillim sezoni në kampionatin spanjoll nuk e kanë prekur besimin e kreut të stolit madrilen. Në fjalën e tij, ai sqaroi: "Barazimet nuk na shqetësojnë, e dimë që rezultati ndaj Levantes nuk kënaq askënd, por i tillë është futbolli. Rezultatet nuk ndikojnë në punën tonë, ndaj do të përpiqemi të luajmë sa më mirë dhe të fitojmë. Ky vit do të jetë i njëjtë, një sezon kalon përmes rezultateve të ndryshme, pozitive apo negative qofshin".
Në lidhje me Kristiano Ronaldon dhe pezullimin e tij, që ndoshta mund të ndikojë në formën e portugezit, Zidan sqaroi: "Kristiano është në gjendje të mirë dhe është duke punuar, i përqendruar maksimalisht në atë që
duhet të bëjë. Sigurisht, ashtu sikurse edhe ne, ai është i lumtur që pezullimi i përfundoi dhe tani mund të rikthehet të luajë normalisht. Fundja, futbolli është jeta e tij dhe është gjëja që di të bëjë më mirë. Jashtë fushës së blertë flitet shumë, por ai nuk shqetësohet. Kristiano ndihet shumë mirë fizikisht e mendërisht dhe duke parë gjithçka ka ndodhur rreth tij, më duket një sinjal pozitiv. Ai është një lider i lindur, që dëshiron gjithmonë të fitojë. Urinë e tij për sukses ua transmeton edhe shokëve të ekipit".
Ndeshjet me ekipet të ashtuquajtura të vogla kanë ndikuar disi në këtë fillim sezoni për "Los Blancos". Kjo nuk e shqetëson aspak Zizunë dhe me sa duket as ekipin e tij. Francezi në fjalën e tij shpjegon: "Champions, kampionat apo miqësore nga ne pritet gjithmonë fitorja. Kështu ndodh ngaherë, ndaj jemi të gjithë të mësuar me trysninë që na ushtrohet. Për sa i përket kundërshtarit, ata kanë përvojë dhe do luajnë sa më mirë duke kërkuar rezultatin pozitiv. Jemi favoritë sa herë zbresim në fushë, por favoritë janë edhe disa ekipe të tjera në Ligën e Kampioneve. Të gjithë jemi të vetëdijshëm për rrugëtimin që na pret dhe duam ta nisim sa më mirë këtë kompeticion".