Takaj 100 mijë euro premio, Skënderbeu “zbut” UEFA-n
Qeveria e futbollit europian paralajmëron ukrainasit: Shqiptarët ua kanë marrë dorën Dinamove, gabim po i nënvlerësuat
Një vit më parë e tronditi me një pezullim nga Kupat e Europës për shkak të dyshimeve për trukim ndeshjesh, ndërsa tani nuk ia kursen elozhet përmes faqes zyrtare në internet. Kjo ndodh me UEFA-n, që duket se është "zbutur" në marrëdhëniet me Skënderbeun. Pas suksesit të jashtëzakonshëm ( për një klub shqiptar) të këtij edicioni, ku korçarët kaluan katër ture në Ligën e Europës dhe siguruan pjesëmarrjen në fazën e grupeve të këtij kompeticioni, UEFA shkon deri atje sa të paralajmërojë ukrainasit e Dinamos së Kievit për forcën që ka Skënderbeu. 24 orë para ndeshjes së parë, të vlefshme për grupin B, UEFA, në përmbledhjen me kuriozitet që i bën sfidës Dinamo Kiev-Skënderbeu, kujton ukrainasit se korçarët dinë si të thyejnë klubet që mbajnë emrin: Dinamo. Natyrisht, nuk bëhet fjalë për Dinamon e Tiranës, por gjithçka i referohet precedentit të fundit, kur bardhekuqtë eliminuan klubin gjigant kroat. UEFA parashikon një takim të vështirë sot për ukrainasit, teksa ndër të tjera citon: "Dinamo Kiev ka treguar një formë të mirë në ndeshjet në shtëpi për Ligën e Europës, por do të bëjë mirë që të mos e nënvlerësojnë
Skënderbeun".
MASA EKSTREME - Mediat ukrainase kanë raportuar dje se policia ka marrë masa shtesë për mbarëvajtjen e ndeshjes. "Autoritetet ukrainase konfirmojnë se do të rriten masat e sigurisë për ndeshjen. Para hyrjes në stadium, tifozët do të kontrollohen nga një
dedektor metali. Nga policia janë marrë masa shtesë, por nuk bëhet e ditur arsyeja. Kjo është diçka e rrallë", shkruanin dje mediat ukrainase.
STATISTIKA - Kjo është hera e parë që Dinamo Kiev dhe Skënderbeu luajnë për Ligën e Europës. I vetmi precedent i korçarëve me një
skuadër ukrainase është në edicionin 2013- 2014, ku në fazën "play-off" kualifikohej Çernomorets Odesa pas goditjeve nga pika e bardhë. Të vetmit lojtarë të Skënderbeut që kanë të kaluar në Ukrainë janë Tefik Osmani ( Metalurg Zaporizhia) dhe Kristi Vangjeli (Çernomorets Odesa).