Tirana, Karabeci bën ligjin në Kavajë
Fitore pa shkëlqim e bardhebluve, por dopieta e kapitenit përmbys golin e Perjas
Tirana hedh një hap drejt kualifikimit. Bardhebluve u kishte "rënë" shkëlqimi krahasuar me Superkupën, megjithatë në fund nuk e diskutuan fitoren në stadiumin "Besa". Edhe pse Perja befasoi kryeqytetasit, një dopietë e Erando Karabecit nderoi kryeqytetasit. Ndeshja rrezikoi që të mos...
Tirana hedh një hap drejt kualifikimit. Bardhebluve u kishte "rënë" shkëlqimi krahasuar me Superkupën, megjithatë në fund nuk e diskutuan fitoren në stadiumin "Besa". Edhe pse Perja befasoi kryeqytetasit, një dopietë e Erando Karabecit nderoi kryeqytetasit. Ndeshja rrezikoi që të mos luhej, pasi policia nuk e mori përsipër. U desh ndërhyrja e Bashkisë Kavajë që të siguronte 10 policë të sigurisë private, që ky duel të startonte, edhe pse me 14 minuta vonesë. BARAZIMI
Loja nis pa ritëm dhe me një Tiranë të çorganizuar. Bardheblutë hasën vështirësi jo vetëm në qarkullim topi, por edhe në ndërtimin e aksioneve. Pasaktësi në çdo kros apo pasim, bëri që edhe ato pak raste që krijoheshin, të mos kishin rrezikshmëri. Përpjekjet e Nogoos dhe Sentamut ishin të dëshpëruara, ndërsa kavajasit u munduan që, me anë të kundërsulmeve, të krijonin momente "paniku" në portën mike. Në të 29- ën ndodh ajo që nuk pritej, Ilion Lika gabon fatalisht. I rrëshket topi nga duart dhe Perja e shfrytëzon më së miri, duke zhbllokuar shifrat. Por, gëzimi i Besës nuk zgjat shumë, pasi në të 31-ën Tirana fiton një penallti, pas një ndërhyrjeje të gabuar te Dukës ndaj Sentamu. Karabeci gjuan nga pika e bardhë dhe nuk zhgënjen, duke i barazuar shifrat në 1-1. PËRMBYSJA
Bledar Sinella, i kthyer në pankinën e Besës, nxjerr Shabanin dhe fut Carën në fushë, ndërsa Ze Maria largon Halilin dhe Hoxhallarin, për Dokën dhe Çelhakën, duke i dhënë më shumë prioritet lojës sulmuese. Bardheblutë gjithsesi mbeten të ngathët në finalizim, ndërsa në të 51-ën dhe 52-ën, Doka dhe Sentamu nuk gjejnë dot rrjetën. E, megjithatë, përmbysja nuk vonon, ndërsa protagonist mbetet kapiteni. Në të 67-ën, Ngoo shërben shkurt për Sentamun, ndërhyn portieri Kaloshi, por topi shkon në këmbët e Karabecit, i cili 4 metra nuk mund të gabonte dhe 1-2. Besa luan pa presion dhe rrjedhimisht shfaqet disi më e çlirët në aksionet e saj. Në të 73-ën, Dervishi dhe më pas Cara rrezikojnë, por ndërhyrjet e Mavejes, Turtullit dhe në fund Çelhakës, shpëtojnë portën. Një minutë më vonë pretendohet një penallti, pas ndërhyrjes së Dajës ndaj
Perjas, por Yzeriaj mendon ndryshe. Perja shfaqet kërcënues edhe në të 78-ën, por shënjestra e tij zhgënjen. Minutat e fundit, por edhe shtesa dëshmojnë qartë se rezultati nuk do të ndryshonte, përtej ndonjë përpjekjeje të dëshpëruar të vendësve.