Spaleti, “urdhër” Interit: Asnjë blof me Krotonen
"Më djeg kur lë lojtarë në shtëpi, duhen 5 zëvendësime"
Një tjetër "kurth". Luçiano Spaleti rikthehet të flasë në prag të transfertës në Krotone, sfidë, të cilën trajneri zikaltër kërkon kujdes maksimal, ashtu si kundër Spalit, në kuadër të kampionatit, i cili përpara ndalesës tjetër të kombëtareve do vendosë zikaltrit përballë Bolonjës, Xhenoas e Beneventos. Në sallën e konferencës për shtyp është paraqitur disi me vonesë, sepse po vendoste rregull te lojtarët. Fjalimin e mbajti me një frymë: "Gabimi që duhet të evitojmë është mendjemadhësia, por në këto raste shoh që djemtë më përgjigjen mirë, edhe kundër Spalit patën vendosshmërinë e duhur. Kemi ende 35 ndeshje për të zhvilluar, të gjitha të rëndësishme. Nuk duhet të ngecim te festimi i një fitoreje të vetme".
RIVALI - "E njoh shumë mirë Nikolan dhe skuadrën e tij, ai di mirë si t'i motivojë. Fillimisht dukej sikur nuk kishin shpresë, por arriti t'i përcjellë mentalitetin e duhur, duke i bërë ta besojnë objektivin për mbijetesë. Duhet të tregohemi të zotët, kampionët nuk e zgjedhin momentin kur duhet të shfaqin vlerat".
VETËM NJË DILEMË - "Kush do të luajë në mesfushë? Po nis të kem disa dyshime, sepse në stërvitje të gjithë kanë punuar mirë në çdo repart. Vartësi nga Ikardi e Perisiç? Janë të jashtëzakonshëm, më të mirët në rolet respektove. Jam kureshtar për të parë reagimin e djemve në momentin e parë të vështirësisë. A arrijmë të luajmë pa Borha Valeron? Ai është i aftë të luajë kudo dhe me cilëndo skuadër, edhe me Barcelonën. Ndoshta nuk jep asistet dhe golat që të gjithë presin, por na bën të fitojnë ndeshjet me mënyrën sesi drejton lojën. Dilema është mes tij dhe Robertos ( Galjardinit)".
FUTBOLLI ITALIAN -
Një tjetër temë e prekur, e lidhur edhe me Interin, është vështirësia e përfaqësueses dhe e klubeve italiane në Ligën e Kampionëve, kur përballen me elitën e Europës: "Futbolli italian nuk po humbet, thjesht po përshtatet me futbollin europian. Edhe buxheti marramendës i disa prej klubeve peshon. Futbolli italian, megjithatë është në rrugën e duhur, kam besim. Gotën e shoh gjithmonë gjysmë plot".
PROPOZIMI - Në mbyllje të konferencës, një mendim për faktin e mosangazhimit në kupa dhe një propozim: "Nuk është gjithmonë një avantazh, kur ke shumë lojtarë në dispozicion, është normale që riaftësohen më shpejt duke pasur pak ngarkesë, por numri i ekipit duhet të jetë i përshtatshëm. Kur lë jashtë lojtarin e 19- ë, i pres gjunjët. Sipas mendimit tim, nevojiten 5 zëvendësime".